Posts Tagged ‘addis ababa’

ዲሲዎችን ለቀቅ!

Wednesday, July 17th, 2013

ከተፈሪ በላይ (የዲሲ ነዋሪ)

ይህን መጣጥፍ እንዳዘጋጅ የገፋፋኝ ጋዜጠኛ አቶ ክንፉ አሰፋ በኢትዮ ሚድያ በኢትዮጵያ ዛሬና EMF ድረ ገጽ ላይ ዲሲን ለቀቅን አስመልክቶ “ዲሲ 2013” በሞል ርእስ የጻፈውን ጽሁፍ ነው። ከጽሁፉ መግነቢያ ላይ ተገለጸወን ሃተታ ማለትም ፈረንጆች በአገራችን ኢትዮጵያ በቆዩ ቁጥር የሚጽፉት ያጣሉ የሚልወን አባባል ባልቀበለውም ወግ ለማጣፈጫ እንደገባ ቅመም ልቁጠረውና ልለፈው።

ሙሉውን አስነብበኝ ...

ዜጎችን ከማሰር ለሕዝብ ጥያቄ አዎንታዊ ምላሽ መስጠት ይሻላል – ግርማ ካሳ

Tuesday, July 16th, 2013

ሐምሌ 8 ቀን 2005 ዓ.ም

ከአርባ ሁለት በላይ የአንድነት አባላትና ደጋፊዎች፣ ሕገ ወጥ በሆነ መንገድ ዛሬ እንደታሰሩ ፍኖት ነጻነት ዘገበ። ከታሰሩት ዉስጥ ሁለቱ ሴቶች ሲሆኑ አብዛኞቹም ወጣቶች ናቸው። በጎንደርና በደሴ የተደረጉ ታላቅ ሰላማዊ ሰልፎችን ተከትሎ፣ በአዲስ አበባ ከተማ 23ቱ ወረዳዎች ያሉ የአንድነት አባላትና ደጋፊዎች ፣ በተመሳሳይ ሰዓት በወረዳዎች ሁሉ በመሰማራት፣ ሕዝቡን በማነጋገር ፔቲሽኖች ሲያስፈርሙ ነዉ ፖሊሶች ያገቷቸው።

አብዛኛዉ የአመራር አባላቱ ከጎንደርና ከደሴ ገና ባይመለሱም፣ በ23ቱም ወረዳዎች ተመሳሳይ እንቅስቃሴዎች በእኩል ሰዓት የተደረጉት፣ የአንድነት ፓርቲ በየቦታዉ ጠንካራ አባላትና ደጋፊዎች ስላሉት ነዉ። ኢሕአዴጎች እነ አንዱዋለም አራጌንና ናትናኤል መኮንን ቢያስሩም፣ ይኸዉ ከየቦታዉ አንዱዋለም አራጌዎች፣ ናትናኤል መኮንኖች ትግሉን እያጧጧፉት ነዉ።

የአንድነት ፓርቲ አባላትና ደጋፊዎች፣ ለደህንነት ሰራተኞችና ፖሊሶች፣ አበባ በማበርከት፣ ፍጹም ሰላማዊና የሰለጠነ ፖለቲካ እንደሚያራምዱ፣ በደሴዉና ጎንደር ሰልፍች ማሳየታቸው፣ በሰፊዉ የተዘገበ ጉዳይ ነዉ። በሰልፎቹ አንድ ጠጠር እንዳልተወረወረ፣ የተሰበረ መኪና፣ የተጎዳ ሰው እንደሌለ በገሃድ ተመስክሯል። አፍቃሪ ኢሕአዴግ አይጋ ፎረም ሳይቀር፣ አንድነት ሰልፉ በሰላም እንዲጠናቀቅ ማድረጉን አመስግኗል።

የአንድነት ፓርቲ፣ አበባ እንጂ ጥይት እንደማያበረክት፣ የሰላም እንጂ የጠብና የጦርነት ፓርቲ እንዳልሆነ እየታወቀ፣ በጎንደርና በደሴ ይሄንኑ አስመስክሮም፣ ገዢው ፓርቲ ግን አሁንም አንድነትን ሕጋዊ ፍቃድ እንዳለዉ የፖለቲካ ፓርቲ ሳይሆን፣ እንደ «ጠላት» እየቆጠረዉ፣ በአባላቱ ላይ ዱላ እየሰነዘረ ነዉ። እርቅ፣ ሰላም፣ የዴሞክራሲ ስርዓት መገንባትን ሳይሆን፣ ሕዝብን ማሸበርንና በጉልበት አፍኖ መግዛትን የመረጠ ይመስላል።

የአንድነት ፓርቲ አመራር አባላት «የድርጅታችን ጽ/ቤቶች በሙሉ እስኪዘጉና ሁላችንም እስክንታሰር ትግላቸን ይቀጥላል» በሚል ቁርጠኝነት እንደሚንቀሳቀሱ በተደጋጋሚ መግለጻቸው ይታወቃል። ገዢዉ ፓርቲ ጥቂቶችን ቢያስር ሚሊዮኖችን ሊያስር እንደማይችል የሚነገሩት አንድነቶች፣ አገዛዙ የሕዝብ ትልቅ ድጋፍ በየክልሎቹ፣ ያለዉን ድርጅት ከመጋፋትና እንደ ጠላት ከማየት፣ አብሮ ለመስራትና ለእርቀ ሰላም እራሱን ቢያዘጋጅ መልካም እንደሆነ ያሳስባሉ።

የጎንደርን ደሴ ሰልፍ ተከትሎ፣ በመቀሌ ታላቅ ሕዝባዊ ሰብሰባ በቅርቡ ይደረጋል። ቀጥሎም በጂንካ (ከአርባ ምንጭ ወረድ ብሎ በደቡብ ኦሞ ዞን) እና በወላይታ ሰላማዊ ተቃዉሞ ሰልፎች ይደረጋሉ። አዳማ፣ ባህር ዳር፣ አዋሳ፣ ድሬዳዋ፣ አዲስ አበባ እያለ ይቀጥላል። የመብት፣ የነጻነት የእኩልነትና የዲሞክራሲ ጥያቄ በምንም ተዓምር ዜጎችን በማሰር አይታፈንም።

አዲስ አበባ ብቻ አይደለም። ይኸዉ በጎንደርና፣ በደሴ ታይቷል። ብዙዎች ከማያውቋት ከጂንካም የዴሞክራሲና የነጻነት ደዉል ይደወላል። የኢሕአዴግ አውራ ፓርቲ ሕወሃት እምብርት ከነበረችውም መቀሌ፣ የጀግናዉ ኣጼ ዮሐንስ ከተማ፣ ዜጎች ከአንድነት ፓርቲ ጀርባ በመሰለፍ ኢትዮጵያዊነትን ያወጃሉ። ለዘር ፖለቲካ፣ ለኢፍትሃዊነትና ኢሰብዓዊንት ፣ ለሙስናና ዜጎችን የማሰርና የማሸበር ፖለቲካ ላይ ያላቸውን ተቃዉሞ ይገልጻሉ። የዴሞክራሲ ድምጽና ደዉል፣ ከሁሉም አቅጣጫ ነዉ የሚመጣዉ። ይሄን ድምጽ ገዢዎች በፍጹም ሊያፍኑት አይችሉም። ቢፈልጉም ፣ ቢሞክሩም እንኳን አቅም አይኖራቸዉም። የሚያዋጣቸው ፀሐይ ሳትጠልቅ፣ ለሕዝቡ ፍላጎትና ፍቃድ ራሳቸዉን ማስገዛት ብቻ ነዉ። አመራሮቹ ቢያስቡበት ይሻላል እላለሁ።

የታሰሩ የአንድነት አባላትና ደጋፊዎችን ስም ዝርዝርን ለማንበብ ከዚህ ይጫኑ !

ሁለት ማሳሰቢያ አለኝ ፡

1. ለነዚህ ወገኖቻችን ያለንን ድጋፍ በተግባር እንግለጽ። የታሰሩት ፔትሽን ሲያስፈረሙ ነዉና እኛም ይሄንን ፔትሽን በመፈረም፣ ሌሎችን በማስፈረም፣ እነርሱ በአካል ለጊዜዉ የማይሰሩትን በመስራት የነጻነትን ድምጽ እናስተጋባ !

2. ሰልፎችን፣ ህዝባዊ ስብሰባዎች ለማድረግ የራሱ የሆነ ወጭ አለዉ። በጎንደርና በደሴ አብዛኛዉን ወጭ የሸፈነው፣ የኑሮ ዉድነት እየከበደዉም፣ አገር ቤት ያለው ሕዝባችን ነዉ። በዚህ ረገድ በኢኮኖሚ የተሻለ ደረጃ ያለነዉ በዉጭ የምንገኝ ኢትዮጵያዉያን ብዙ ይጠበቅብናል።

ፔትሽን ለመፈረም ፣ የሚሊዮኖች ድምጽ ለነጻነት እንቅስቃሴን በገንዘብ መርዳት ለምንፈልግ ወደ ሚከተለዉ ድህረ ገጽ አድራሻ እንሂድ፡

http://www.andinet.org/

‹‹ታች በሌ››

Tuesday, July 16th, 2013
የዛሬ ሃያ ዓመት ከኮተቤ መምህራን ኮሌጅ እንደተመረቅኩ የመምህርነት ሥራዬን የጀመርኩት እነዋሪ በምትባል በሰሜን ሸዋ ውስጥ ከምትገኛና ከአዲስ አበባ 165 ኪሎ ሜትር በምትርቅ ከተማ ውስጥ በሚገኝ ትምህርት ቤት ነበር፡፡ እነዋሪ ከመርሐቤቴ እስከ ዜና ማርቆስ የሚኖረው ቆለኛና ደገኛው ጅሩዬ የሚገናኙባት የቀለጠች የገበያ ከተማ ናት፡፡ በተለይም በፍራፍሬ ምርቷ ትታወቃለች፡፡ ኤፍሬም እሸቴ የእነዋሪን ሙዝ ‹ከማጠሯ መጎጠሯ› እያለ ይቀልድባት ነበር፡፡
ከእነዋሪ እየተነሣሁ እስከ ዠማ ወንዝ ድረስ ለሠርግም፣ ለንግሥም ቆላውን እወርድ ነበር፡፡ ገበሬዎቹ ከቆላው ይመጡና እኔን በቅሎ ላይ አውጥተው በትከሻቸው ላይ ውጅግራ ጠበንዣቸውን ደልደል አድርገው ተሸክመው የጋቢያቸውን ግማሽ ጠቅልለው አናታቸው ላይ በማስቀመጥ፣ ከግራና ከቀኝ በቅሎዋን እየነዱ፣ ያንን እንደ ያሬድ መዝሙር በጆሮ የሚንቆረቆረውን ወጋቸውን እያወጉ፣ እንደ ዝንጀሮ ገደሉን በኩራት ይወርዱታል፡፡ ተረታቸው፣ ቀረርቷቸው፣ ፉከራቸው፣ ዘፈናቸው፣ የታሪክ ትረካቸው፣ ስለ ጀግኖቻቸው የሚገጥሙት ግጥም አሁንም በጆሮዬ እንደ መስክ ነፋስ ሲያልፍ ይሰማኛል፡፡ 

አንድ ቀን ታድያ አይዋ ሰጥ አርጌ የሚባሉ ቆፍጣና ገበሬ አብረውን ወደ ዠማ ሲጓዙ ታች በሌ ስለሚባል ሽፍታ አወጉኝ፡፡ ታች በሌ በተለይ በሞረቶች ዘንድ በጣም የታወቀ አስቂኝ ሽፍታ ነው፡፡ አንድ ሰው ያላሰበበትን፣ ያልተዘጋጀበትንና ያለ ዐቅሙ የሆነውን ነገር ጀመረ ሲባል ዠማዎች ‹‹ምን የእርሱ ነገርኮ የታች በሌ ሽፍትነት ነው›› ይሉታል፡፡ አንድ ሰው በስሜት ብቻ ተነሣስቶ እንዴው የጀብደኛነትን ሥራ ሲሠራ፣ አንድን ነገር አስቦ ከመሥራት ይልቅ ከሠራ በኋላ ሲያስብ ዠማዎች እንዲሁ ‹ታች በሌ› ይሉታል፡፡ ለምን?
ታች በሌ የዠማ ሰው ነው፡፡ የኖረው ከዛሬ ሁለት መቶ ዓመት በፊት በሸዋው አስፋ ወሰን ዘመን ነው  አሉ፡፡ በዚያ ዘመን ሞረትን ይገዙት የነበሩት ጥዱ የተባሉ ኃይለኛ በላባት ነበሩ፡፡ እንዲያውም ጥዱና አስፋ ወሰን እርስ በርሳቸው የሚፎካከሩም የሚፈታተኑም ኃይለኞች ስለነበሩ ግጥሞቻቸው ዘመን ተሻግረው ደርሰውናል፡፡ አስፋ ወሰን ሞረትን ማስገበር ስለፈለጉ
ለሞፈር ለቀንበር የሚሆነኝን
ሳልቆርጠው አልቀርም ዘንድሮ ጥዱን፤
ብለው ለአዝማሪ ነገሩ አሉ፡፡ ይህን የሰሙት ጥዱም
አስፋ ወሰን ይፋት ጠንክረው ይረሱ
ሞረት ጥዷል ብለው ከሚመላለሱ፤
ብለው መለሱላቸው ይባላል፡፡
ጥዱ ኃይለኛ አስገባሪ፣ አስጨንቆ ገዥ ነበሩና ብዙ ገበሬዎችን እንደ ሰም አቅልጠው፣ እንደ ብረት ቀጥቅጠው፣ እንደ ጫማ ረግጠው ይገዙ ነበር፡፡ ከተገዥዎቹ ገበሬዎች አንዱ የነበረው ታች በሌ መረረው፡፡ በልጅነቱ በሰሜን ሸዋ በረሃዎችና ጫካዎች ሸፍተው ገዥዎችን ስላስጨነቁ ሽፍቶች እየሰማ ነበርና ያደገው መሸፈት አማረው፡፡ አንድ ቀን ከብት ይጠብቁ ለነበሩ እረኞች መሸፈቱን ነግሮ የአጎቱን ቁመህ ጠብቀኝ መንትፎ ሸፈተ፡፡ ሸፍቶም ጫካ ገባ፡፡ አገሩም ‹ታች በሌ ሸፈተ› እያለ ከሚዳ እስከ እነዋሪ አወጋ፡፡ አንዳንዱ አደነቀ፤ ዘፈነለት፤ አንዳንዱ ተጠራጠረ፣ አንገቱን ነቀነቀበት፡፡ ‹በምን ልቡ ነው የሸፈተው›› ያሉም ነበሩ፡፡ ጥዱም እገለዋለሁ ብለዋል ተባለ፡፡
ታች በሌ ዠማ ወንዝ በረሃ ውስጥ ወርዶ አንድ ጫካ ውስጥ ተቀመጠ፡፡ መጀመሪያ ስሙ በድፍን ሸዋ ሲገንን፣ ስሙ በየሠርግ ቤቱና በየድግስ ቤቱ የዘፈን መቋጠሪያ ሲሆን እየታየው ልቡ በደስታ ሞቆ ነበር፡፡ ዋል አደር ሲል ግን ታች በሌን ጥያቄዎች ጭንቅላቱን እየሞሉ ያስጨንቁት ነበር፡፡ ለመሆኑ በቂ ስንቅ ይዘሃል? የሸፈትከውኮ በጀግናው ጥዱ ላይ ነው፤ ለመሆኑ በቂ ጥይት ታጥቀሃል? ለመሆኑ ቢመጡብህ የምትሸሽበት የማምለጫ ስርጥ መርጠሃል? አንተ መንደርህ እያለህ አንድ ቆቅ እንኳን አድነህ የማታውቅ እንዴት ጥዱን ለመዋጋት ጫካ ገባህ? ለመሆኑ ዛሬ የታጠቅከውን ቁመህ ጠብቀኝ ተኩሰህበት ታውቃለህ? ቢበላሽ ማን ይጠግንልሃል? ከዛሬ በፊት ለመሆኑ ጫካ ውለህ አድረህ ታውቃለህ? ከአውሬ ጋር ታግለህ ታውቃለህ?
እነዚህ ጥያቄዎች ጭንቅላቱን ሲወጥሩት ታች በሌ መልስ አልነበረውም፡፡ የዠማን በረሃ ወደ መርሐ ቤቴ ሲያልፍበትና ወደ ጅሩ ሲወጣበት እንጂ ውስጡ ገብቶ ሥር ማንሥሩን አይቶት አያውቅም፡፡ እንዲያውም አሁን ሲያስበው ትንሽ ፍርሃት ሳይኖርበት አይቀርም፡፤ እንደ ሌሎቹ እንኳን ቅራት (ከብትን በረሃ ውስጥ ሌሊት መጠበቅ) ለብቻው አድሮ አያውቅም፡፡ ደግሞ አሁን ሸፍቷልና የሚያወያየው እንኳን የለም፡፡ እየዋለ እያደረ ሃሳብ ሲበዛበት ታች በሌ ይጨንቀው ነበር፡፡ ሽፍትነት ሲያስቡትና ሲሸፍቱት አንድ አልሆነለትም፡፡ እርሱ እዚህ በረሃ ውስጥ ምን እንደሚያደርግ ጨንቆታል፣ እዚያ መንደር ውስጥ ግን በስሙ ይዘፈን ይሆናል፡፡ የልቡን ማን አየለት፡፡ ለእርሱ ከሚዘፍኑለት ስንቅና ትጥቅ ቢያቀብሉት ነበር የሚሻለው፡፡
ታች በሌ ለአንድ ሳምንት በረሃው ውስጥ ተቀመጠ፡፡ ስንቅና እድሜ እያደር ይቀላል እንዲሉ የያዘው ነገር ሁሉ እያደር ያልቅበት፣ እርሱም ብቸኛነትን አልለመደውም ነበርና እያደር ሆድ ይብሰው ጀመር፡፡ አንዳንዴም ሲያስበው መሸፈት እንዳልነበረበት ራሱን ይሞግታል፡፡ አሁን እንዴት አድርጎ ወደፊት መጓዝ እንደሚችል ያስባል፤ ግን ምንም ሃሳብ ሊመጣለት አልቻለም፡፡ ወደ ኋላ እንዳይመለስ ሰው ምን ይለዋል? አንዳንዴ የተወለደበትን ቀን ትቶ የሸፈተበትን ቀን ይረግማል፤ አንዳንዴ ደግሞ እንኳን ሸፈትኩ ይላል፡፡ ቢጠብቅ ቢጠብቅ ጥዱም ሆኑ የጥዱ አንጋቾች ወደ አካባቢው ዝር ሊሉ አልቻሉም፤ ታድያ ሳይዋጋ ሽፍታ ተብሎ እስከ መቼ ሊቀመጥ ነው፡፡ እንዲህ ከሆነኮ ጥቂት ቆይቶ ይረሳል፡፡
ታች በሌ እየቆየ ነገር ዓለሙ መረረው፤ መሸፈቱንን እንጂ ለምንና ምን ሊያደርግ እንደሸፈተ ለኅሊናው ማስረዳት አልቻለም፤ ቀጥሎ ምን እንደሚያደርግና ከዚያስ መጨረሻው ምን እንደሆነ ሊያውቀው አልቻለም፡፡ እገሌ ሸፈተ ሲባል እንጂ ሽፍትነት ምን እንደሆነ፣ ሸፍቶ ምን እንደሚደረግ በልቡ ምንም ነገር አልያዘም፡፡
አንድ ቀን ታች በሌ ድንገት የሚኖርበት መንደር ያለች ቤተ ክርስቲያን ውስጥ በቅዳሴ ሰዓት ከች አለ፡፡ አገርም ጉድ አለ፡፡ ካህናቱም ጨዋውም እያየው አፉን ይዞ ቀረ፡፡ ታምር ተሰምቶ የሰንበት ቂጣ ሊታደል ሲል ታች በሌ ድንጋይ ይዞ ሕዝቡ እግር ሥር ወደቀና ይቅርታ ጠየቀ፡፡ ሰይጣን አሳስቶኝ ነው ብሎ በዚያ መከረኛ ላይ አላክኮ ካህናቱ ድንጋዩን አነሡለት፡፡
አንድ ሰሞን የታች በሌ ነገር የሞረቴ ሁሉ አፍ ማሟሻ ሆነ፡፡ ከዚያ በኋላ ለሞረቴ መሸፈት ቀላል አልሆነም፤ ‹‹ደግሞ እንደ ታች በሌ ሲርብህ እንዳትመጣ›› የሚባለው ብዙ ነው፡፡ እንዲያውም አንድ ሰው ሸፈተ ሲባል አቅራሪዎቹ
ምከሩት፣
ምከሩት፣
ምከሩት፣
ይህንን ታች በሌ ለምን አትመክሩትም፤
ይህንን ታች በሌ ለምን አትነግሩትም፤
ልብ ካልሸፈተ እግር አይሸፍትም ….. ሃ!
እያሉ ይመክሩት ነበር፡፡ ታች በሌ ሳያስቡ ለሚወስኑና ሳያስቡ ለሚያደርጉ ሁሉ የሚሰጥ ቅጽል ሆነ፡፡
ታች በሌያዊ አስተሳሰብ የሀገራችን ተቋማት አንዱ ችግር ነው፡፡ አንዳንድ ፓርቲዎች፣ ማኅበራት፣ ድርጅቶች፣ ኩባንያዎችና ስብስቦች ሳይታሰቡ ተመሥርተው ሃሳብ የጠፋባቸው ናቸው፡፡ ለሃሳብ ተቋም ከመመሥረት ይልቅ ለተቋማቱ ነው ሃሳብ እየተፈለገ ያለው፡፡ ቁጭት ሁሉ፣ ብስጭት ሁሉ፣ ስብስብ ሁሉ፣ ገንዘብ ሁሉ፣ አጋጣሚ ሁሉ ድርጅት፣ ፓርቲ፣ ተቋም፣ ማኅበር ለመመሥረት መዋል የለበትም፡፡ እነ ዕገሌ ስለ መሠረቱ፣ እነ እገሌ ስለተሰባሰቡ፣ የዕገሌ አካባቢ ሰዎች በስማቸው ፓርቲ ስለመሠረቱ፣ የዚህ ዓይነት ሞያ ሰዎች ማኅበር ስላቋቀቋሙ፣ የዚያ ሀገር ሰዎች ኮሙኒቲ ስለ ፈጠሩ፣ እንቶኔና እንቶኔ ኩባንያ ስላቋቋሙ እኛም ማቋቋም የለብን፡፡  
መጀመሪያ ሃሳብ ይቅደም፡፡ ማሰብ ማለት ደግሞ ሃሳብን ብልጭ ማድረግ ማለት አይደለም፡፡ ይህማ ታች በሌን መሆን ነው፡፡ ብልጭ ያለውን፣ ቁጭት የፈጠረውን ሁሉ ሳያስቡበት ተጣድፎ ማድረግ፡፡ ማሰብ እንዲህ አይደለም፤ ግራ ቀኝ የታሰበበት፣ የተጠናና የተነበበበት፣ ከቀደምቶች ልምድ የተቀሰመበት፣ ከተሳካላቸውም ካልተሳካላቸውም ትምህርት የተወሰደበት፣ እንዴት እንደሚኬድ፣ ግቡ ምን እንደሆነ፣ የተሻለው መንገድ የትኛው እንደሆነ፣ የሚያስፈልጉ ነገሮች ምን እንደሆኑ፣ ከነ ማን ጋር መተባበር እንደሚገባ፣ ምን ሊያጋጥም እንደሚችል፤የፍልስፍና መስፈንጠሪያው ምን እንደሆነ አጥልቆና አልቆ መመርመር ነው- ማሰብ፡፡
አንዳንድ ሰው አስቤያለሁ ሲል ‹‹ይህ ነገር በአእምሮዬ መጥቶልኛል›› ማለቱ ነው፡፡ ይህኮ ሰው በመሆኑ ብቻ የሚያጋጥመው ነው፡፡ በአምስቱ የስሜት ሕዋሳቱ መረጃዎች ወደ አእምሮው ሲገቡ ልክ በቁልፍ እንደሚነሣ መኪና ቅንጭሌውን ሊያስነሡት ይችሉ ይሆናል፡፡ ይህ ግን መኪናው በቁልፉ ስለተነሣ ብቻ ሄደ እንደማይባለው ሁሉ ሰውዬውም አሰበ አያስብለውም፡፡ መጀመሪያ የመኪናው ባትሪ ቀጥሎ ሞተሩ መነሣት አለበት፡፡ ሞተሩ ደግሞ ሌሎችን ሁሉ አንቀሳቅሶ ሙሉ መኪናው መሥራት አለበት፡፡ ያን ጊዜ መኪናው ሄደ ይባላል፡፡
ሰውም ሃሳብ ብልጭ ስላለለት፣ የሆነ ቁጭት ስለተፈጠረበት፣ ከሆነ ሰው አንዳች ነገር ስላገኝ፣ በአጋጣሚ አንድ መረጃ ስለደረሰው፣ ቅናት ስላደረበት፣ ዕድል ስለተፈጠረለት፣ ዘመዶቹ ክፈት እንረዳሃለን ስላሉት ብቻ ተቋም፣ ድርጅት፣ ፓርቲ፣ ማኅበር መመሥረት የለበትም፡፡ አንዳንዶች የሆነ ነገር ለማድረግ አስበው ከመሰባሰብ ይልቅ ተሰባስበው ምን እንናድርግ? ብለው ያስባሉ፡፡ አንዳንድ ፓርቲዎች እንደ ታች በሌ ሳያስቡ የሸፈቱ ናቸው፡፡ የተለየ ሃሳብ፣ የተለየ ፍልስፍና፣ የተለየ አቋም፣ የተለየ መንገድ ሳይኖራቸው እንዴው በፓርቲዎቻችን ቁጥር ላይ አንድ ለመጨመር ያህል ብቻ የተመሠረቱ፡፡ ፓርቲው ከተመሠረተ በኋላ ነው ፕሮግራም፣ መመሪያ፣ ፍልስፍና፣ መንገድ፣ የሚያዘጋጁት፡፡ በሃሳብ ስለማይመሠረቱ ከተመሠረቱ በኋላ በሃሳብ ይለያያሉ፡፡ ሳስበው እንዲያውም ለሁሉም ችግሮቻችን መፍትሔ ስጡ ስንባል ኮሚቴ ማቋቋም የሚቀናን ለማሰብ ጊዜ ስለማንሰጥ ይመስለኛል፡፡ የስብሰባ፣ሞቅታ የፈጠራቸው ኮሚቴዎች ሃሳብ አጥተው ሲላጉ አባሎቻቸውን አንጠባጥበው መቼ እንደፈረሱ እንኳን ሳይታወቅላቸው ይፈርሳሉ፡፡ ታች በሌዎች በቁጭት ብቻ ተነሥተው የመሠረቷቸው የሞያ ማኅበራትም ከዓመታዊ ጉባኤ ያለፈ ሃሳብ ሊመጣላቸው ስላልቻለ፡፡ በአንድ ሊቀ መንበር ሃያ ዓመት እያዘገሙ እንዴት ናችሁ? ሲባሉ ‹አለን›› እያሉ ካሉት በታች ከሞቱት በላይ ሆነው ይኖራሉ፡፡
አንዳንዶችም አሉ፤ ምን እንደሚጽፉ ሳያስቡ መጽሐፍ ለመጻፍ የሚነሡ፡፡ ምን እንደሚገጥሙ ሳያስቡ ግጥም ለማሳተም የሚውተረተሩ፡፡ ምን እንደሚያቀርቡ ሳያስቡ ፊልም ለማዘጋጀት ገንዘብ የሚያሰባስቡ፡፡ የተለየ ሃሳብ ሳይኖራቸው የሬዲዮ የዐየር ሰዓት የሚገዙ፡፡ ምን እንደሚጠይቁ ሳያስቡ የቃለ መጠይቅ ማይካቸውን ተጠያቂው ላይ የሚተክሉ ቀልደኞች፡፡ ለነገሩ በሠፈር አንድ ሱቅ ሲከፈት የሠፈሩ  ሰው ሁሉ አጥሩን እየቀደደ ሱቅ መሥራት የተለመደበት ሀገር ውስጥ ነው ያለነው፡፡ ያዋጣል ወይ? ከጎረቤቴ በምን እለያለሁ? እኔ ምን አዲስ ነገር አመጣለሁ? ብሎ ሳያስብ ነው ሱቁን ቦግ የሚያደርገው፡፡ ሱቁን ከሠራና ዕቃ ካስገባ በኋላ ነው ማሰብ የሚጀምረው፡፡ ይህ ነገር ወደ ተቋሞቻችንም ተጋብቷል፡፡ ምን ተቋሞቻችን ብቻ ትዳሮቻችንም እንዲህ እየሆኑኮ ነው፡፡ ማግባት የሚፈልግ እንጂ እንዴትና ለምን እንደሚያገባ፣ የጋብቻው ጠባይና አካሄድ ምን እንደሚመስል አስቀድሞ የሚያስብ ጥቂቱ ነው፡፡  የሆነ ቦታ ለመሄድ እያሰብኩ ነው፤ የሆነ ነገር ሳልከፍት አልቀርም፤ አንድ የሆነ መጽሐፍ ልጽፍ እያሰብኩ ነው፤ የሚላችሁ ሰው ሳያስብ አንዳች ነገር ሊያደርግ የተዘጋጀ መሆን አለበት፡፡
አስቦ መሥራት እንጂ ሠርቶ ማሰብ ኪሣራው ብዙ ነው፡፡ ገበያ መውጣታቸውን እንጂ ምን ሊገዙ እንደወጡ፣ ቤት መሥራትና መግዛት እንጂ ምን ዓይነት ቤት እንደሚገዙ ወይም እንደሚሠሩ፣ ውጭ ሀገር መሄድ እንጂ ለምንና እንዴት እንደሚሄዱ፣ የማያስቡ አሉ፡፡ በአንዳንድ ሀገሮች የነበረውን መንግሥት ስለመቀየር እንጂ በቅያሪው ስለሚመጣው መንግሥት ስላልታሰበበት የመጣው ከሄደው የባሰበት ጊዜ አለ፡፡ ለዚህ ነው ታች በሌያዊ የሆነውን መንገድ ትትን ሃሳብ ከተቋም ይቅደም የምለው፡፡ ሃሳብ ከድርጊት ይቅደም፡፡ ሃሳብ ከመመሪያም፣ ከዐዋጅም፣ ከማፍረስም፣ ከመሥራትም፣ ከመሸለምም፣ ከመቅጣትም፣ ከመሄድም ከመምጣትም ይቅደም ፡፡
አንድ ሰው እንዲያውም ይህንን ነግሮኛል፡፡ የአንድ ገበሬ ውሻ ሁልጊዜ መንገድ ዳር እየቆመ አላፊ አግዳሚውን መኪና ለመያዝ እየተከተለ ይጮኻል፡፡ የገበሬው ጓደኛ ይኼ የውሻው ጠባይ ይገርመዋል፡፡ አንድ ቀን ገበሬውን ‹‹ለመሆኑ ይኼ ውሻህ መኪናውን ተከትዬ እይዘዋለሁ ብሎ ነው እንዲህ መከራን የሚያየው?›› ይለዋል፡፡ ገበሬውም ሳቅ ብሎ ‹‹እኔ ለመያዝ መታገሉ አይደለም የሚያስገርመኝ፤ የሆነ ቀን ሊይዘው ይችላል፡፡ እኔን የሚገርመኝ መኪናውን ቢይዘው ምን እንደሚያደርገው ውሻው አለማሰቡ ነው›› አለው ይባላል፡፡ ታች በሌያዊ  አስተሳሰብ ማለት ይህ አይደለም ታዲያ፡፡

በቅድስት ሥላሴ መ/ኮሌጅ ጉዳይ ቋሚ ሲኖዶስ አስቸኳይ ስብሰባ ጠራ

Tuesday, July 16th, 2013
  • ደቀ መዛሙርቱ ጽ/ቤቱ ከመንግሥት በመነጋገር የደኅንነት ጥበቃ እንዲደረግላቸው ጠይቀዋል
  • የልዩ ጽ/ቤቱን ለቃችኹ ውጡ ትእዛዝ ‹‹ሕግን የጣሰና ለከሳሽ ያደላ›› በሚል ተቃውመውታል
  • የቅ/ሲኖዶሱ ዋና ጸሐፊ እና የጠ/ቤ/ክህነቱ ዋ/ሥራ አስኪያጅ ደቀ መዛሙርቱን እያረጋጉ ነው
  • የፓትርያሪኩ ረዳት ሊቀ ጳጳስ አቡነ እስጢፋኖስ ከደቀ መዛሙርቱ ጎን ቆመዋል ተብሏል
  • ኹኔታው ያሳሰባቸው የማታ ተማሪዎች ተወካዮች ከቅ/ሲኖዶስ ጽ/ቤት ጋራ ተወያይተዋል
  • የኮሌጁ መምህራን አቡነ ጢሞቴዎስ ከበላይ ሓላፊነታቸው እንዲነሡ መጠየቃቸው ተሰምቷል
  • በሕገ ቤተ ክርስቲያን ኮሌጁን በበላይነት የመቆጣጠር ሥልጣን የዋ/ሥራ አስኪያጁ ነው
  • የኮሌጁ ቦርድ እና አስተዳደሩ ብቃት ባላቸው ባለሞያዎች እንዲደራጅ የጠየቀው አጣሪ ኮሚቴው ቦርዱ ተጠሪነት ከቅ/ሲኖዶስ ይልቅ ለጠቅላይ ቤተ ክህነት ጽ/ቤት እንዲኾን በሪፖርቱ መክሯል
  • ‹‹ኮሌጁ እንደ ሀ/ስብከቴ ነው፤ በኮሌጁ ጉዳይ ጣልቃ አትግቡብኝ!›› /አቡነ ጢሞቴዎስ/
  • ‹‹የኮሌጁን ጉዳይ ለኔ ተዉት!›› /ብፁዕ ወቅዱስ ፓትርያርክ አቡነ ማትያስ/

 

EOTC_HeadQuarterየቅድስት ሥላሴ መንፈሳዊ ኮሌጅ የቀኑ መደበኛ መርሐ ግብር እስከ መጪው ፳፻፮ ዓ.ም መስከረም ወር አጋማሽ ድረስ እንደተዘጋና ደቀ መዛሙርቱ ኮሌጁን እስከ ዛሬ ሐምሌ ፱ ቀን ፳፻፭ ዓ.ም ‹‹በሰላማዊ መንገድ›› ለቀው እንዲወጡ የፓትርያሪኩ ልዩ ጽ/ቤት በትላንትናው ዕለት በይፋ ያወጣውን ማስታወቂያ የተቃወሙ የቋሚ ሲኖዶሱ አባላት ቅ/ሲኖዶሱ ለአስቸኳይ ስብሰባ እንዲጠራ መስማማታቸው ተገለጸ፡፡

ሐራዊ ምንጮች ከመንበረ ፓትርያሪኩ ምንጮችና ውዝግቡ አፋጣኝ እልባት እንዲያገኝ በበጎ ፈቃድ ከሚንቀሳቀሱ አካላት እንደተረዱት÷ የቅዱስ ሲኖዶስ ዋና ጸሐፊ፣ የጠቅላይ ቤተ ክህነት ዋና ሥራ አስኪያጅ እና አራቱ ተተኪ/ተለዋጭ የቋሚ ሲኖዶሱ አባላት የፓትርያሪኩ ልዩ ጽ/ቤት ያወጣውን ማስታወቂያ በመቃወም በኮሌጁ ወቅታዊ ኹኔታ ላይ ለመወያየት አስቸኳይ የስብሰባ ጥሪ ለቅ/ሲኖዶሱ አባላት አድርገዋል፡፡

ቅ/ሲኖዶሱ በአስቸኳይ ስብሰባው÷ ልዩ ጽ/ቤቱ ያወጣው ማስታወቂያ ከሕገ ቤተ ክርስቲያንና ውዝግቡን ለማጣራት የተቋቋመው ኮሚቴ ካቀረበው የመፍትሔ ሐሳቦች አንጻር ያለው አግባብነት ይፈተሻል፤ ኮሚቴው ከአጭርና ከረጅም ጊዜ አኳያ ያቀረባቸውን የማስተካከያ ርምጃዎች መርምሮ ተፈጻሚ እንዲኾኑ መመሪያ ይሰጣል፤ ከዚህም ባሻገር አካላዊ ጤንነታቸው ለያዙት ሓላፊነት ብቁ አያደርጋቸውም የተባሉትን የኮሌጁን የበላይ ሓላፊ ሊቀ ጳጳስም የማንሣት ርምጃ ሊወስድ ይችላል ተብሎ እንደሚጠበቅ ምንጮቹ ጠቁመዋል፡፡

የቋሚ ሲኖዶሱ ሰብሳቢ ቅዱስ ፓትርያሪኩ ቢኾኑም በሕገ ቤተ ክርስቲያን አንቀጽ ፲/፪/ሀ መሠረት የቅዱስ ሲኖዶሱ አስቸኳይና ድንገተኛ ጉባኤ ቅዱስ ፓትርያሪኩ ወይም ቋሚ ሲኖዶሱ በሚያደርጉት ጥሪ ሊካሄድ ይችላል፡፡ በሕመምና በልዩ ልዩ ከአቅም በላይ በኾነ ምክንያት አንዳንድ አባላት ባይገኙ እንደ አጀንዳው ዐይነት /የሃይማኖትና ቀኖና ቤተ ክርስቲያን ወይም የአስተዳደር መኾኑ/ ተለይቶ ከዚህ አኳያ የምልአተ ጉባኤው መሟላት ተወስኖ ስብሰባው ሊደረግ እንደሚችል በዚሁ አንቀጽ ፫/ሀ እና ለ ላይ ተደንግጓል፡፡


የደብረብርሀን ነዋሪዎች ፍትህ አጣን አሉ

Tuesday, July 16th, 2013

ሐምሌ ፱( ዘጠኝ )ቀን ፳፻፭ ዓ/ም

ኢሳት ዜና :-በሰሜን ሺዋ ዞን የደብረ ብርሃን ከተማ ኗሪዎች የመንግስት ሹማምንት የሚያደርሱባቸውን በደሎች በመዘርዝር ለመንግስት አቅርበዋል።

ክልሉ በቅርቡ በጀመረው የህዝብ ብሶቶችን መስሚያ መድረኮች ላይ ነዋሪዎች ” በአደባባይ እንደበደባለን ፤እንታሰራለን፤ በአገራችን በሰላም ለመኖር አልቻልንም” ሲሉ ምሬታቸውን ገልጸዋል፡፡በተደጋማሚ በሚደርስባቸው በደል አገር ጥለው የሚሰደዱ ዜጎች መበራከታቸውንም ነዋሪዎቹ ገልጸዋል።

ሹመት የሚሰጠው በዘመድ ዝማድ ነው ያሉት አንድ ተናጋሪ ፣ ድርጊቱን በሚቃወሙት ላይ ደግሞ እርምጃ እንደሚወሰድባቸው ተናግረዋል

ሌላው ተናጋሪ ደግሞ ” በዘመድ የተሾመ ባለስልጣን እና በ15 ቁጥር ምስማር የተመታ እንጨት አንድ ናቸው ፣ ሁለቱም አንዴ ከገቡ ለመንቀል ያስቸግራሉ” ካሉ በሁዋላ፣ “ክፉ የሚሰራው ይሾማል፣ ደጉ ደግሞ ይወረዳል ሲሉ አክለዋል።

“አመራሮችን የሚገመግሙ ሰዎች በግል ህይወታቸው ላይ እርምጃ እንደሚወሰድባቸው በስብሰባው ላይ የተሳተፉ ሌላ ተናጋሪ ገልጸዋል

ኢሳት በእንጅባራ፣ በደሴና ወልድያ የተካሄደውን ህዝባዊ ስብሰባ በድምጽ ማቀርቡ ይታወሳል። በሁለቱም ስብሰባዎች ላይ ህዝቡ በአስተዳደሩ ምሬቱን ሲገልጽ ተስተውሏል። አንድ ተናጋሪ ” የኢህአዴግ ባለስልጣናት በጡንቻቸው ስለሚያሰቡ ህዝቡን ለስቃይ ዳርገውታል በማለት በእነዚህ አካባቢዎች ያለውን ችግር ገልጸውታል

በተለያዩ አካባቢዎች የተካሄዱትን ስብሰባዎች በመቅረጽ ለላኩልን የደብረብርሀን፣ የእንጅባራ፣ የደሴና ወልደያ ነዋሪዎች ምስጋናችንን ለማቅረብ እንወዳለን።

በኦጋዴን 500 ሰዎች መታሰራቸው ተዘገበ

Tuesday, July 16th, 2013

ሐምሌ ፱( ዘጠኝ )ቀን ፳፻፭ ዓ/ም

ኢሳት ዜና :-በያዝነው ወር ብቻ 500 ሲቪሎች፣ ከጅጅጋ፣ ደገሀቡር፣ ዋርዴር እና ጎዴ በደህንነት ሀይሎች ተወስደው እስር ቤት ገብተዋል።

አዲሱ የእስር ዘመቻ የተከፈተው በቅርቡ በርካታ የመንግስት ባለስልጣናትና ወታደሮች ከድተው እጃውን ለኦጋዴን ነጻ አውጭ ድርጅት ከሰጡ በሁዋላ መሆኑን ድርጅቱ ገልጿል።

ከታሰሩት መካከል በርካታ ህጻናትና ሴቶች ሲገኙበት፣ አብዛኞቹም ጅጅጋ አካባቢ በሚገኝ ወታደራዊ ካምፕ ውስጥ መታሰራቸው ታውቋል።
ሙሀመድ ሂሮ የተባለ የአካባቢው የኤች አይቪ ኤድስ መቆጣጠሪያ ሀላፊ እና ስዊድን የተወለደ ኢትዮጵያዊ  ይገኙበታል።

የአለማቀፍ የሰብአዊ መብት ተሟጋች ድርጅቶች ና የመገናኛ ብዙሀን በኦጋዴን አካባቢ የሚካሄደውን የሰብአዊ መብት ጥሰቶች ለመታዘብ እንዳይችሉ መታገዳቸው ይታወቃል።

የኢትዮጵያ መንግስት መጪውን የብሄር ብሄረሰቦች ቀን በጅጅጋ ለማክበር ማሰቡን ተከትሎ በቅርቡ በርካታ አርቲስቶችና ጋዜጠኞች ጅጅጋንና አካባቢውን እንዲጎበኙ መደረጋቸው ይታወሳል።

በአማራ ክልል በ12 ወረዳዎች ባለፉት 10 አመታት 13 ሺ 64 ሰዎች ከነፍስ ግድያ ወንጀል ጋር በተያያዘ ተገድለዋል

Tuesday, July 16th, 2013

ሐምሌ ፱( ዘጠኝ )ቀን ፳፻፭ ዓ/ም

ኢሳት ዜና :- 11 ሺ 93 ስዎች ከነፍስ ግድያ ሙከራ ተደርጎባቸው ተርፈዋል፡፡

የክልሉ አሰተዳደር እና ፀጥታ ቢሮ ባካሄደው  የዳሰሳ ጥናት በ10 አመታት ውስጥ ከነፍስ ግድያ ጋር በተያያዘ 13 ሺ 64 ሰዎች ሲገደሉ ፣ 11 ሺ 93 ሰዎች ደግሞ ቆስለዋል። በጥናቱ ውስጥ እንደተመለከተው ድብደባ መፈጸም ቀዳሚነቱን ሲይዝ  አካል ማጉደል እና ነፍስ ማጥፋት ወንጀሎች  ተከታታዮችን ደረጃዎች ይዘዋል።

የክልሉ ኗሪዎች በወንጀሎች መበራከት ለእስር ፤ለመበታተን፤ለሽፍትነት ፤ለመሰደድ፤ ለድህነት ፤ለጦም አዳሪነት፣  ለማህበራዊ ፤ኢኮኖሚያው ምስቅልቅሎች መዳረገቸው በጥናቱ ተመልክቷል፡፡

በ2004 ዓ.ም በክልሉ ማረሚያ ቤቶች በነፍስ ግድያ ወንጅል ተጠርጥረው ለገቡ  22 ሺ 26 ታራሚዎች  ሌሎች ወጭዎችን ሳያካትት ለምግብ አገልግሎት ብቻ 73 ሚሊዩን 130 ሺ 40 ብር ወጭ መደረጉም በጥናቱ ተጠቅሷል።

እያንዳንዱ ታራሚ  በትንሹ አምስት አመት ቢታሰር  በ 5 አመት 365 ሚሊየን 650 ሺ 200 ብር ወጪ ይደረጋል።

ጥናቱ በአማራ ክልል ካሉ 11 ዞኖች ውስጥ በተመረጡ 6 ዞኖች 12 ወረዳዎች ብቻ የተካሄደው ነው፡፡

የሱዳኑ ፕሬዚዳንት ከናይጀሪያ ለቀቁ

Tuesday, July 16th, 2013

ሐምሌ ፱( ዘጠኝ )ቀን ፳፻፭ ዓ/ም

ኢሳት ዜና :- የአፍሪካ ህብረት በጤና ጉዳይ ላይ ለመመካከር በናይጀሪያ ባዘጋጀው ስብሰባ ላይ የተገኙት የሱዳኑ ፕሬዚዳንት ኦማር አልበሽር ሰብሰባቸውን ሳይጨርሱ ወደ አገራቸው የተመለሱት ፣ አለማቀፉ የወንጀለኞች ፍርድ ቤት የናይጀሪያ መንግስት ይዞ እንዲያስራቸው አቤቱታውን ለፍርድ ቤት ካቀረበ በሁዋላ ነው።

ፕሬዚዳንቱ ሰኞ እለት ንግግር ያደርጋሉ ተብሎ ሲጠበቅ፣ በድንገት አገሪቱን ለቀው መውጣታቸው ታውቋል።

ፕሬዚዳንት በሽር ናይጀሪያ ሲገቡ የናይጀሪያ መንግስት የክብር አቀባበል አድርጎላቸው ነበር።  የናይጀሪያ አለማቀፍ የወንጀለኞች ፍርድቤት ጥምረት ፕሬዚዳንቱ ታስረው ፍርድ ቤት እንዲቀርቡ ለአገሪቱ ከፍተኛው ፍርድ ቤት ክስ መስርቶ እንደነበር ዘገባዎች አመልክተዋል።

Amharic News 1800 UTC – ጁላይ 16, 2013

Tuesday, July 16th, 2013
News, Ask the Doctor, Agriculture and Business

የኤርትራ ወጣቶች

Tuesday, July 16th, 2013
ብሔርተኝነትን መግለፅ ለኤርትራዉያን ወጣቶች የሚመጣ ችግርን መከላከያ ጥሩ ሥልት ነዉ።ሌላ ቢሎ መዘዙ ሌላ ነዉ።አምስት ሚሊዮን ሕዝብ ያላት ትንሽ ሐገር እራሷን ከተቀረዉ ዓለም ዘግታለች።ከሠላሳ ዓመት ጦርነት በሕዋላ በተባበሩት መንግሥታት ድርጅት ድጋፍ ነፃነትዋን በይፋ ያወጀችዉ በ1985 ነዉ።

ግጭት እና እስራት በጋሞጎፋ ዞን

Tuesday, July 16th, 2013
በደቡብ ክልል ጋሞጎፋ ዞን ቁጫ ወረዳ የማንነት፣ የመልካም አስተዳደር እና የልማት ጥያቄዎችን ያነሱ ከሁለት መቶ የሚበልጡ ሰዎች መታሰራቸውን

“ጋንዲ” ስደተኞችን የሚረዳው ድርጅት

Tuesday, July 16th, 2013
ከዛሬ አምስት ዓመት ተኩል ወዲህ ደግሞ ጋንዲ በሲና በረሃ በግብፅ በሊቢያና በቱኒዝያ እስር ቤቶች የሚሰቃዩ ባመዛኙ ኤርትራውያን ስደተኞችን እየረዳ ነው ። ጋንዲ ሲና በረሃ የታገቱ በርካታ ስደተኞችን ከአፋኞቻቸው ነፃ ለማውጣት በቅቷል ።

የዘረኝነት ቅሌት በኢጣልያ

Tuesday, July 16th, 2013
በኢጣልያ የሊጋ ኖርድ ፓርቲ እንደራሴ እና የሕግ መወሰኛ ምክር ቤት ምክትል ፕሬዚደንት ሮቤርቶ ካልዴሮሊ በሀገሪቱ የመጀመሪያዋ ጥቁር ሚንስትር ዶክተር ሴሲል ኪዬንጌ ላይ አሳፋሪ አስተያየት የሰነዘሩበት አነጋገር ከተለያዩት የሀገሪቱ ፓርቲዎች እና ከሕዝቡ ብዙ ተቃውሞ ቀስቀሰ።

UTC 16:00 የዓለም ዜና 160713

Tuesday, July 16th, 2013
የዕለቱ ዜና

መጾም ለጤና

Tuesday, July 16th, 2013
መጾም መራብ ሳይሆን ተፈጥሯዊ የሆነ የአኗኗር ስልት ነዉ ይላሉ የዚህ ሃሳብ አራማጆች። ዓላማቸዉ በየደረጃዉ ተዘጋጅተዉ ለገበያ በሚቀርቡት የተለያዩ የኢንዱስትሪ ምግቦች ምክንያት ወደአካላችን ገብቷል የሚሉት አላስፈላጊ ንጥረ ነገር እነሱ መርዝ የሚሉትን በተፈጥሯዊ ስልት ከሰዉነት ለማስወገድ ነዉ።

እስራኤልና አፍሪቃዉያን ስደተኞች

Tuesday, July 16th, 2013
እስራኤል በምድሯ የሚገኙ ጥገኝነት ጠያቂ አፍሪቃዉያንን ወደየመጡበት አስገድዳ መመለሷን የመብት ተሟጋቾች አወገዙ። ከትናንት በስተያ እስር ላይ ካቆየቻቸዉ ሁለት ሺህ ኤርትራዉያንና ሱዳናዉያን መካከል 14 ኤርትራዉያንን ወደአስመራ መላኳን አንድ የእስራኤል የመብት ተሟጋች ድርጅትና ሂዉማን ራይትስ ዎች ይፋ አድርገዋል።

ሸንጎ የኢትዮጵያ ሕዝብ በቀጣይነት እያካሄደ ካለው ትግል ጎን ይቆማል

Tuesday, July 16th, 2013

የኢትዮጵያ ሕዝብ የጋራ ትግል ሸንጎ (ሸንጎ) ዕሁድ ሐምሌ 6 ቀን 2005 ዓ. ም በጎንደርና በደሴ ከተሞች የተካሄዱትን ትዕይንተ-ሕዝቦች ይደግፋል። ”የሚሊዮኖች ድምፅ ለነፃነት!” በሚል መሪ ሃሳብ ሥር በአንድነት ፓርቲ አቀነባባሪነት የተጀመረው የሕዝብ እንቅስቃሴ፤ የተጋረጠበትን እንቅፋት ሁሉ አልፎ እነሆ በደሴና በጎንደር ከተሞች በከፍተኛ የሕዝብ ተሳትፎ በሕዝባችን ላይ እየደረሰ ያለውን ግፍ የፍራቻ ድባብን ሰብሮ በይፋ ለመግልጥ መቻሉ ሁሉንም ኢትዮጵያዊ የሚያኮራ ተግባር ነው።

ሃሳብን በሰላማዊ መንገድ መግለጥ የሰው ልጅ የተፈጥሮ መብት ነው። ይህ መብት ደግሞ ሰው በሰውነቱ ሊከበሩለት ከሚገቡት በርካታ መብቶች ውስጥ አንዱ ሲሆን በዓለም አቀፍ ሕግጋትም የተደነገገ ነው።

የኢትዮጵያ ሕዝብ ብሶቶች እጅግ ብዙ ናቸው። በኑሮ ውድነትና ሥራ አጥነት መሰቃየት፣ ከዚህም የተነሳ ስብዕናውን የሚያዋርዱ ተግባራት ውስጥ እንዲሰማራ መገደዱ፤ የሕግ የበላይነት ተደፍጥጦ የሕዝቡ በሆነ ባልሆነው ምክንያት መደብደብ፤ መታሰር፣ መሰቃየት፤ መገደልና ለስደት መዳረግ ዕለታዊ ተግባራት መሆናቸው፤ ሙስና በስፋት መንሰራፋቱ፤ የመፃፍ፤ የመናገር፤ በነፃነት የመደራጀት መብቱ ሊከበርለት አለመቻሉ፤ በሃይማኖቱ ውስጥ የአገዛዙ ጣልቃ ገብነትና አያደረሰበት ያለው ሰቆቃ፣ ሕዝብ ለዘመናት ከኖረበት ቀየው ያላግባብ መፈናቀሉ፤ በሀገሩ ጉዳይ ላይ ድምፁን ሊያሰማ አለመቻሉ፣ በሚናገረው ቋንቋ ምክንያት በገዛ ሀገሩ እንደ አንድ ኢትዮጵያዊ ተዘዋውሮ ለመሥራትና ለመኖር አለመቻሉ፣ ሕዝብ የሚፈልገውን መንግሥት ሊመርጥ አለመቻሉ…ወዘተ በዚህ ሥር የሚጠቃለሉ ሰቆቃዎች ናቸው፡

ከላይ የተጠቀሱትን ሰቆቃዎች አስወግዶ መብቶችን ለማቀዳጀትና እንደሰው ለመኖር የፍራቻ ድባብን ወርውሮ በመጣል አጠንክሮ መታገል የግድ ነው። ተደጋግሞ እንደሚነገረው፤ ያለትግል ድል የለምና።

አዎ ያለው አገዛዝ በጭካኔ የተሞላ ነው። ያለው አገዛዝ ሕዝብ በፍርሃት ተሸብቦ ፀጥ ለጥ ብሎ እንዲገዛ የማያደርገው ነገር የለም። አገዛዙ በሥልጣን ላይ ለመቆየት ይረዱኛል የሚላቸውን እርምጃዎች ሁሉ ቢወስድም፤ ለመብቶቹ መከበር የሚታገልን ቆራጥ ሕዝብ ግን ለረጅም ጊዜ አንበርክኮ መግዛት አይችልም። ይህን ሃቅ ከራሳችን የትላንትና የትላንት በስቲያ ታሪካችን፤ እንዲሁም ዛሬ በሰሜን አፍሪካና በመካከለኛው ምሥራቅ ከሚታየው እውነታ ትምህርት መውሰድ ይቻላል።

ከጥቂት ሳምንታት በፊት በአዲስ አበባ፤ አሁን ደግሞ (ሐምሌ 6 ቀን 2005 ዓ. ም) በጎንደርና በደሴ ከተሞች የተካሄዱት ሰላማዊ ሰልፎች፤ የኢትዮጵያ ሕዝብ የፍራቻ ድባብን ሰብሮ በመውጣት መብቶቹን ለማስከበር ቆርጦ የተነሳ መሆኑን ያረጋግጣሉ። ይህ በቁርጠኝነት እየተካሄደ ያለው አበረታች ትግል ውጤታማ እንዲሆን ደግሞ የፖለቲካ ድርጅቶች ጥቃቅን ልዩነቶችን ወደጎን በመተው በአንድነትና፣ በቀጣይነት የሕዝቡን ትግል ማስተባበር ይጠበቅባቸዋል። ስለሆነም ይህንን ታሪካዊ ግዳጅ ለመወጣት ይቻል ዘንድ የኢትዮጵያ ሕዝብ የጋራ ትግል ሸንጎ (ሸንጎ) ድርጅቶች ተባብረው እንዲታገሉ አሁንም ጥሪውን ያቀርባል። ሸንጎው ከምሥረታው ጀምሮ በተደጋጋሚ እንደገለጸው ሁሉ ዛሬም ከሁሉም ኢትዮጵያዊ ድርጅቶች ጋር ተባብሮ ለመሥራት ዝግጁ መሆኑን ያረጋግጣል።

የተባበረና የቆረጠን ሕዝብ ፍላጎት የሚገታ ምንም ኃይል ከቶውንም አይኖርም!
ድል ለኢትዮጵያ ሕዝብ!

ድል መሰዋትነት ይፈልጋል! ከተስፋዬ ዘነበ(ኖርዌይ

Tuesday, July 16th, 2013

ሃብትና ስልጣን አስክሮአቸው፣ በዚህች ደሃ ሃገርና ሕዝብ ላይ ተፈናጠው ሁለት አስርተ አመታት ያስቆጠሩ አምባገነን መሪዎቻችን የሃገርና የሕዝበ ፍቅር አጥተው በምዝበራ ለመክበር ብቻ፣ ሕዝብንም በሃገሩ በሰላም የመኖር መብቱን ቀምተው ተደላድለው ለመቀመጥ ዘንድሮም እንደ አምናው በሽብር ስም በጫኑብን የአፈና መረብ ሸብበው ሕዝቡን ከዳር እዳር ማስጨነቃቸው ሳያንስ አሁን ደግሞ ለዚህ እኩይ ተልኳቸው ላሰለጠኑዋቸው የስርዓቱ ሰዎች (ደህንነቶች) በዴሞክራሲና በመልካም አስተዳደር ችግር ከኑሮው ጋር ደፋ ቀና የሚለውን ሰላማዊ ሕዝብ የሚያሰቃዩበትንና ባስም ሲል የሚገሉበትን ህጋዊ ፈቃድ ሰጥተዋቸዋል፡፡

ስለዚህ ዘረኛ ቡድን ብዙ ጊዜ ብዙ ቢባልም አሁን ባለንበት ወቅት አለም በዴሞክራሲና በመልካም አሰተዳደር ከደረሰበት ደረጃ አንፃር እንደ ሃገርና ሕዝብ ለሚደርስብን ቤሔራዊ ውርደት፣ ለምንቀበለው መከራና እንግልት የወያኔ ዘረኛ ቡድን ግንባር ቀደም ተጠያቂ ቢሆንም መብታችንንና ስብህናችንን ብሎም ሃገራችንን አሳልፈን ሰጥተን ስለጥቃታችን ስናወራ አመታት ያሳለፍን እኛም የታሪክ ተጠያቂዎች ነን፡፡ በውስጥም በውጪም ያለን ኢትዮጲያዊያን ወያኔ ወገኖቻችንን ጭዳ ሲያደርግ፣ የሃገራችንን ቤሄራዊ ጥቅም ለሌሎች አሳልፎ ሲሰጥ፣ ለሃገርና ለሕዝብ ተቆርቁረው በድፍረት ድምፃቸውን ያሰሙ ጋዜጠኞችም ሆኑ የፖለቲካ ድርጅት መሪዎችን በፈለገው ሰዓት የፈለገውን ስም እየሰጠ ሰላማዊ ህይወታቸውን ቀምቶ ወህኒ ሲወረውራቸው የአንድ ሰሞን መነጋገሪያ ከማድረግ ውጪ ለምን? እንዴት? ብለን መጠየቅ ተስኖናል፡፡

የሚገርመው በየትኛውም መመዘኛ ፈፅሞ ልክ ሊሆኑ የማይችሉ፣ የሕዝብን በሃገሩ በነፃነት የመኖር መብት የሚፃረሩ አሸማቃቂና አንቀጥቅጠው የሚገዙ የስርዓቱ ሰነዶች ሕግ ሆነው ሲፀድቁ ከዛም ተግባራዊ ሲሆኑ አይተናል፣ ይሁንና ከዚህ ዘረኛ ስርዓት እኩል እድሜ ያላቸው በሰላማዊ መንገድ እንታገላለን ለውጥም እናመጣለን ብለው ከሚንቀሳቀሱት ቱባ ድርጅቶች መግለጫ ከማውጣት ባለፈ ሕዝብን አደራጅተው በመንግስት ላይ ምንም አይነት አስገዳጅ እርምጃ ሲወስዱ አልታየም፡፡ ይልቁንም ልዩነታቸውን አቻችለው የጋራ ወይም የሃገርና የሕዝብ ጠላት የሆነውን ስርዓት ከመታገል ፋንታ እርስ በእርሳቸው ሲናከሱና ሲጠላለፉ ከሃገርና ከሕዝብ በፊት ግለሰብ ወይም ድርጅት እያስቀደሙ የወያኔ መናጆ ሆነው ዘመናቸውን የፈጁ እንዳሉ ከማንም የተሰወረ አይደለም፡፡

የራሱ መርህና እቅድ ያለው የፖለቲካ ድርጅት ያለውን የተለየ ሃሳብ ለህዝቡ ማሳወቅ ተቀዳሚ አላማው ሊሆን ይገባል፡፡ ምክኒያቱም ድርጅት እንጂ ወደ ሕዝብ ወርዶ መርሆውንና እቅዱን ማሳወቅ ያለበት ሕዝብማ እንደ ሕዝብ ችግሩንና በደሉን የሚቀርፍለት ታግሎ የሚያታግለው የኔ የሚለው የፖለቲካ ድርጅት መፈለጉ አይቀሬ ነው፡፡

አንድ የፖለቲካ ድርጅት እንደ ድርጅት ምልኡ የሚሆነው የተነሳለትን አላማና እቅድ እንዲሁም የሕዝብን መሰረታዊ የመብት ጥያቄዎች ተግባራዊ ምላሽ እንዲያገኙ በፅናት መታገል ሲችል ነው፡፡ እንደ ወያኔ ያለ አምባገነን ስርዓት አፍኖ ለያዘው የሕዝብ የመብት ጥያቄ ምላሽ የሚሰጠው በተፅኖ እንጂ በችሮታ አይደለም፡፡ ለሚጠየቀው ህገ መንግስታዊ የሕዝብ ጥያቄ ተገቢውን ምላሽ እንዲሰጥ አይጠበቅም አምባገነን ነውና፡፡ ስለሆነም መብቱን የሚያስከብር ለምን?! በቃኝ፣! እምቢ! የሚል የሕዝብ አደረጃጀት እንዲኖር የፖለቲካ ድርጅቶች በተገቢው ደረጃ ሕዝብን ማደራጀትና መርሆና፣ እቅዳቸውን ማስረፅ እንዲሁም ለለውጥ የተዘጋጀ ትግሉን ከዳር ሊያደርስ የሚችል ፍርሃቱን የሰበረ የህብረተሰብ ሃይል ሊገነቡ ግድ ይላቸዋል፡፡

የወያኔ ዘረኛ ቡድን ህገ መንግስቱ የሚፈቅድልንን ለቁጥር የሚታክቱ መብቶቻችንን ቢነፍገንም፣ ሚያዚያ 30 1997ዓ.ም የነበረውን የቅንጅት የድጋፍ ሰልፍ ተከትሎ ለስምንት አመታት ቀምቶን የነበረውን ሰላማዊ ሰልፍ የማድረግ ህገ መንግስታዊ መብታችንን ለማስመለስ ከአመታት በሗላ በወጣቶች ለተደራጀው ሰማያዊ ፓርቲ ምስጋና ይግባውና እጅግ በተጠና ወቅትና ጊዜ የመሰለፍ መብታችንን ከገዢዎቻችን እጅ አውጥቶ አሳየን፡፡የሕዝቡንም የተጫነውን የፍርሃት ድባብ በመግፈፍ እረገድ ሰማያዊ ፓርቲ ሃላፊነቱን ተወቷል፡፡ ነገር ግን ይህንን ማድረግ የቻሉት በሰላማዊ መንገድ እንታገላለን ብለው ሁለት አስርተ አመታት የተጓዙ የተለያዩ ድርጅቶች ሲሄዱበት ከነበረው ሃለፊነት ያለመውሰድና በፍርሃት ከመሸበብ ልክፍት ስለወጡ ነው፡፡ የአገሪቱ ህገ መንግስት ሰላማዊ ሰልፍን ለማካሄድ እንደ ቅድመ ሁኔታ የሚጠይቀው ማሳወቅ እንጅ ማስፈቀድ አይደለም ስለሆነም ሰማያዊ ፓርቲ ማሳወቅን እንደ አንድ ግዴታው በመቁጠር ሂደቱን ካከናወነ በሗላ አላማውን ለማሳካት ቁርጠኛ እርምጃ መውሰዱ አምባገነኑን ቡድን አማራጭ እንዲያጣ ስላደረገው በአንድ ሳምንት ቢራዘምም ይሁንታውን እንዲሰጥ አስገድዶታል፡፡

የሰማያዊ ፓርቲ ስኬት ለሌሎችም እንደ ማንቂያ ደውል በመሆኑ እንሆ አንድነትም በጎንደርና በደሴ በአቋሙ በመፅናቱ ከብዙ ውጣውረድ በሗላ እጅግ የተሳካ ሰላማዊ ሰልፍ አድርጓል፡፡ አሁን በተጀመረው የትግል እንቅስቃሴ ውስጥ ቀጥተኛ ተሳታፊ በመሆን በተለይ የድርጅት አመራሮች እራሳቸውን ለተሰለፉለት አላማ በማስገዛትና ድል ያለመስዋትነት እንደማይገኝ በመረዳት ታግለው ማታገል ይጠበቅባቸዋል፡፡
የምንታገለው በሃገራችን በነፃነት የመኖር ሰዋዊ መብታችንን በአፋኝ አምባገነን መሪዎች በመነጠቃችን ነው፡፡መብታችንን ለማስመለስ አስገዳጅ የትግል ስልት ካልቀየስን በስተቀር ወይም የስርዓቱን አፋኝ ህግጋቶች ላለመቀበል እምቢ እስካላልን ድረስ ከአምባገነን ስርዓት ተፈጥሯዊ ባህሪ አንፃር በነሱ ይሁንታ የምናገኘው ፍታዊ ምላሽ አይኖርምአ፡፡
ድል ለኢትዮጲያ ሕዝብ!!!
ሞት ለወያኔና ከፋፋዮች!!! ለአስተያየቶ-ftih_lewegen@yahoo.com

ሰበር ዜና ዛሬ አዲስ አበባ ውስጥ በፖሊስ የታሰሩት የአንድነት አባላት ከ42 ደርሰዋል ከታሳሪዎቹ ውስጥ ሁለት ሴቶች ይገኙበታል

Monday, July 15th, 2013

ዛሬ ሐምሌ 8 ቀን 2005 ዓ.ም መንግስት የአንድነት ፓርቲ የአዲስ አበባ ዞን የወረዳ አመራሮችንና አባላትን በዘመቻ ማሰር ጀምሯል፡፡ እስከአሁኗ ሰዓትም 42 የሚሆኑ የአንድነት ለዴሞክራሲና ለፍትህ ፓርቲ አባላት በፖሊሲ ቁጥጥር ስር ይገኛሉ፡፡ የፍኖተ ነፃነት ጋዜጠኞች ተዘዋውረው እንደዘገቡት 42 የሚሆኑ የአንድነት ፓርቲ አባላት በፖሊስ እንዲታሰሩ ተደርጓል፡፡ የአንድነት ፓርቲ በአዲስ አበባ እያሰራጨ ያለውን ህጋዊ በራሪ ወረቀት ለህዝብ በማደላቸው የተያዙት አባላት ከአዲስ ከተማ 15፣ ከጉለሌ7 ፣ ከየካ 9 እንዲሁም ከንፋስ ስልክ ላፍቶ ናቸው፡፡
የሚሊዮኖች ድምፅ ለነፃነት በሚል መሪ ቃል እየተካሄደ ባለው ህዝባዊ ንቅናቄ የተደናገጠ የሚመስለው ኢህአዴግ በየአካባቢው የአንድነት አባላትን ምክንያት እየፈለገ ማገትና ማሰሩን ገፍቶበታል፡፡
ዛሬ ከታሰሩት 42 የአንድነት ፓርቲ አባላት መካከልባለፈው ሳምንት ቄራ አካባቢ ተመሳሳይ ወረቀት ሲበትኑ በህገወጥ መንገድ በፖሊስ ታስረው የነበሩት ስንታየሁ ቸኮልና ዳንኤል ፈይሳ ዛሬም በድጋሚ ህገወጥ እስር እንተፈፀመባቸው ለማወቅ ተችሏል፡፡

ዛሬ ህገወጥ እስር የተፈፀመባቸው የአንድነት አባላት የሚከተሉት ናቸው፡-

ስንታየሁ ቸኮል
ዳንኤል ፈይሳ
ኤፍሬም ሰለሞን
ታሪኬ ከፋ
ዘገዬ እሸቴ
ተፈሪ ተሾመ
ሀብታመ አድነው
ፍቃዱ በቀለ
ብስራት ተሰማ
መኳንንት ብርሀኑ
ፋና ወልደጎርጊስ
ሽፈራው ተሰማ
ፋንቱ ዳኜ
ገነት ሰለሞን
አላዛር አርአያ
ሳሙኤል ኢሳያስ
ደመላሽ ሙሉነህ
አማኑኤል መንግስቱ
ታሪኩ ጉዲሳ
አስማረ ንጉሴ
ፍቃደስላሴ ግርማ
አሸናፊ አስማረ
ዳንኤል
ለሚ ስሜ
ሰይፈ
ባዩ ተስፋዬ
ሰለሞን አክሊሉ
ወርቁ አንድሮ
ኃይሉ ግዛው
ሸዋአገኘው ማሞ
ቴዎድሮስ ገብሬ
አክሊሉ ሰይፉ
ንጉሴ ቀነኒ
ደረጀ ጣሰው
ገዛኸኝ አዱኛ
ሰፊው መኮንን
ታደለ ድሪባ
ሀብታሙ ሺበሺ
ሽመልስ ድንቁ
በየነ አበበ

አዲስ አበባ ላይ አርባ የአንድነት ሰዎች መታሠራቸውን ፓርቲው ገለፀ – ጁላይ 16, 2013

Monday, July 15th, 2013
UDJ, Addis Ababa, arrests

የአንድነት መሪዎች ከአማራ ክልል ፕሬዚዳንት ጋር ተገናኙ – ጁላይ 16, 2013

Monday, July 15th, 2013
UDJ-leaders-Amhara region and President

ሰበር ዜና – ደቀ መዛሙርቱ ኮሌጁን ለቀው እንዲወጡ የፓትርያሪኩ ልዩ ጽ/ቤት በይፋ አዘዘ

Monday, July 15th, 2013
  • የኮሌጁ የቀን መርሐ ግብር እስከ መስከረም አጋማሽ ፳፻፮ ዓ.ም ድረስ እንዲቋረጥ ተወስኗል
  • ደቀ መዛሙርቱ በቀጣ ርምጃዎቻቸው ላይ እየመከሩ ነው

የቅድስት ሥላሴ መንፈሳዊ ኮሌጅ ደቀ መዛሙርት ኮሌጁን ‹‹በሰላማዊ መንገድ›› ለቀው እንዲወጡ የፓትርያሪኩ ልዩ ጽ/ቤት በይፋ አዘዘ፡፡

ልዩ ጽ/ቤቱ ዛሬ፣ ሐምሌ ፰ ቀን ፳፻፭ ዓ.ም ከቀትር በኋላ በኮሌጁ የለጠፈው ማስታወቂያ፣ የኮሌጁ ደቀ መዛሙርት ማስታወቂያው ከወጣበት ከዛሬ ሐምሌ ፰ እስከ ነገ ሐምሌ ፱ ቀን ፳፻፭ ዓ.ም ድረስ ኮሌጁን ‹‹በሰላማዊ መንገድ›› ለቀው እንዲወጡ በጥብቅ አሳስቧል፡፡


Amharic News 1800 UTC – ጁላይ 15, 2013

Monday, July 15th, 2013
News, Sports, African Topics and Health

ተቃዉሞ ሠልፍና የኢትዮጵያ ፖለቲካ

Monday, July 15th, 2013
የተቃዉሞ ሠልፍ መደረጉን፥ አንዳዶች ገዢዉ ፓርቲ ላለፉት ስምንት ዓመታት ይከተለዉ ከነበረዉ መርኹ የመለሳለሱ ምልክት ይሉታል።ተቃዋሚ ፓርቲዎች የመጠናከራቸዉ ማሳያ ነዉ-ባዮችም አሉ። ሌሎች ደግሞ ቢያንስ ተቃዋሚ ፓርቲዎችን የሚደግፈዉ ሕዝብ ተቃዉሞዉን ለማሰማት ዶክተር ነጋሶ እንዳሉት የመቁረጡ አብነት ነዉ።

UTC 16:00 የዓለም ዜና 15.07.2013

Monday, July 15th, 2013
ዜና

ሰላማዊ የተቃውሞ ሰልፍ በጎንደርና ደሴ

Monday, July 15th, 2013
አንድነት ለዴሞክራሲና ለፍትኅ ፓርቲ ፤«የሚሊዮኖች ድምፅ ለነጻነት »በሚል መሪ ቃል ለ 3 ወራት ያወጣውን የህዝብ ንቅናቄ እቅድ ትናንት በጎንደርና ደሴ ከተሞች ሰላማዊ ሰልፍ እንዲከናወን በማድረግ ጀመረ። ከትናንቱ ሰልፍ በፊት ፣ ህዝብ ለሰልፍ እንዲወጣ

በጎንደርና ደሴ ከተሞች ኤ.ኤም.ኤፍ ያጠናቀረዉ መታየት ያለበት ዘገባ

Monday, July 15th, 2013

በጎንደርና ደሴ ከተሞች ኤ.ኤም.ኤፍ ያጠናቀረዉ መታየት ያለበት ዘገባ

ለማንበብ ከዚህ ይጫኑ!

በቂልንጦ እስርቤት የእሰረኞች ደም በድብደባ እንደጎርፍ መፍሰሱን የአይን እማኞች ተናገሩ

Monday, July 15th, 2013

ሐምሌ ፰( ስምንት )ቀን ፳፻፭ ዓ/ም

ኢሳት ዜና :- አርብ ፣ ሀምሌ 6 2005 ዓም በእነ አቶ ተሻለ ኮርኔ መዝገብ የተከሰሱ 69 የኦሮሞ ተወላጆች ፍርድ ቤት መቅረብ ሲገባቸው፣ ፍርድ ቤት የሚወስዳቸው ፖሊስ ያጣሉ። በቅጽል ስሙ ሻእቢያ እየተባለ የሚጠራውን የእስር ቤቱን ሀላፊ ሲጠይቁት ቀጠሮአቸው ለ4 ወር መራዘሙን ይነግራቸዋል። እስረኞቹም ” ከ2 አመታት በላይ የላፍትህ ታስረን በመጨረሻ ብይን በሚሰጥበት ወቅት ለ4 ወራት ተራዝሟል መባሉ ተገቢ አይደለም”  በማለት ለጠቅላይ ሚኒስትር ሀይለማርያም ደሳለኝ የሚላክ ፊርማ ማሰባሰብ  ሲጀምሩ ማረሚያ ቤቱ መረጃው ይደርሰውና 69ኙ እሰረኞች በ20 ተከፋፍለው ወደ ተለያዩ የማረሚያ ክፍሎች ወይም ዞኖች እንዲበተኑ ይደረጋል።

አርብ ጧት ሌሎች እስረኞች ወደ ውጭ እንዳይወጡ ከተደረገ በሁዋላ ፣ ሻእቢያ በሚባለው የእስር ቤቱ ሀላፊና ከውጭ በመጡ የፌደራል ፖሊስ አባላት እንዲደበደቡ ይደረጋል። አስተባባሪ ናቸው የተባሉትን 18 እስረኞችን እንደገና በማውጣት በሰደፍና እና በዱላ ከቀጠቀጡዋቸው በሁዋላ 8ቱ ራሳቸውን ሲስቱ ወደ እስር ቤቱ የህክምና ክፍል ይወሰዳሉ።  ችግሩ ከአቅሙ በላይ መሆኑን የእስር ቤቱ የህክም ክፍል በመግለጹ፣ በአምቡላንስ ወደ ሆስፒታል ተወስደዋል።

የአይን እማኞች ለኢሳት እንደገለጹት እስረኞቹ የተደበደቡበት ቦታ በደም በመጨቅየቱ አርብ እለት በውሀ ሲታጠብ አርፍዷል።

ከፍተኛ ጉዳት ከደረሰባቸው መካከል በላይ ኮርሜ ፣ ተፈሪ ቀብኔሳ እና መንግስቱ ግርማ የሚባሉ ይገኙበታል።

በጉዳዩ ዙሪያ ያነጋገርናቸው የአህኮ ሊቀመንበር ዶ/ር መረራ ጉዲና እሰረኞቹ መደብደባቸውንና የተወሰኑት ሆስፒታል መግባታቸውን መረጃው እንደደረሳቸው ገልጸዋል።

ዶ/ር መረራ “ድርጊቱን በተደጋጋሚ ለመንግስት አመልክተን መልስ በማጣታችን መንግስት ሆን ብሎ በፖሊሲ ደረጃ ይዞ የሚያካሄድ ይመስላል” ሲል አክለዋል።

የእስር ቤቱን ሀላፊዎች ለማግኘት ሙከራ ብናደርግም አልተሳካልንም።

በአዲስ አበባ የአንድነት ፓርቲ አባሎች እየታሰሩ ነው

Monday, July 15th, 2013

ሐምሌ ፰( ስምንት )ቀን ፳፻፭ ዓ/ም

ኢሳት ዜና :-ፓርቲው በደሴና እና በጎንደር የተሳኩ የተቃውሞ ሰልፎችን ባካሄደ ማግስት ከ30 በላይ አባሎቹ በዋና ከተማዋ የተቃውሞ ፊርማ ሲያሰባስቡ በፖሊስ ቁጥጥር ስር ውለዋል።

ባለፉት ሳምንታትትም በተመሳሳይ መንገድ የታሰሩ እና የፍርድ ቤት ውሳኔ በመጠባበቅ ላይ ያሉ አባላት አሉ።

አንድነት ፓርቲ ለ3 ወራት በሚቆየው የተቃውሞ እንቅስቃሴ  በዋና ዋና ከተሞች ሰላማዊ ሰልፎችን ከማካሄድ ባሻገር ቤት ውስጥ ስብሰባዎችንና እና 1 ሚሊዮን ኢትዮጵያውያንን ፊርማ ያሰባስባል።

ፓርቲው በደሴና በጎንደር ያደረገው ተቃውሞ ለፓርቲው አባላት ከፍተኛ መነቃቃት እንደፈጠረ አንዳንድ አባላቱ ተናግረዋል።

የቅድስት ሥላሴ መንፈሳዊ ኮሌጅ ተማሪዎች አመጽ እንደቀጠለ ነው።

Monday, July 15th, 2013

ሐምሌ ፰( ስምንት )ቀን ፳፻፭ ዓ/ም

ኢሳት ዜና :-የቅድስት ሥላሴ መንፈሳዊ ኮሌጅ ተማሪዎች ሕዝበ ክርስቲያኑ ከጎናቸው እንዲቆም በመጠየቅ ትናንት በአመታዊ የሥላሴ ክብረ በዓል ላይ  መፈክሮችን ሲያሰሙ ውለዋል።

ተማሪዎቹ ሲያሰሙዋቸው ከነበሩት መፈክሮች መካከል፦የቅድስት ሥላሴ መንፈሳዊ ኮሌጅን መዝጋት ታሪክን ማጥፋት/ማበላሸት ነው!፣የቅዱስ ሲኖዶስ ምልአተ ጉባኤ ችግራችንን ይመልከት!፣ሙስናንና ኑፋቄን የሚያደቅ ክንድ አለን!የምንማረው በምእመናን ብር ነው፡፡ ሌቦች ሆይ፣ እጃችኹ ይሰብሰብ! “የሚሉት ይገኝበታል።

እንዲሁም፦”ልጆቹን የማይጠይቅ አባት አለን?”በማለት በጥያቄ መልክ ድምፃቸውን ሲያስተጋቡ የነበሩት ተማሪዎቹ፤

“ችግራችንን የሚሰማንና መፍትሔ የሚሰጠን አባት ዐጣን!፣የቅ/ሲኖዶሱ አባላት ትኩረት ይስጡን!፣ሙስናን በቃል ሳይኾን በተግባር እንዋጋ! ተማሪዎች ሙስናን በመዋጋታቸው ሊበረታታቱ እንጂ ሊባረሩ አይገባም!”ብለዋል።

“ከአየህጉረ ስብከቱ ቤተ ክርስቲያንን አምነን ወጥተን ለረኀብ ተጋለጥን፡፡”ያሉት ተማሪዎቹ ኮሌጁ በመዘጋቱ  ምግብ ከተመገቡ ሰባተኛ ቀናቸውን እንዳስቆጠሩ ተናገረዋል።

“አቤቱ የኾነብንን አስብ፡፡” የሚለውንና በመጽሀፍ ቅዱስ የሚገኘውን የኤርምያስ ሰቆቃ በጋራ ሲሉ የተደመጡት የመንፈሳዊ ኮሌጅ ተማሪዎቹ፤ኮሌጁን የሚዘጋውና የሚከፈተው ሲኖዶስ ነው ብለዋል።
የተቃውሞ መፈክራቸውን በመቀጠል፦”“ኮሌጁ የኢትዮጵያ ሕዝብ እንጂ የግለሰቦች አይደለም!፣እውነትን- ሙስና አይደለም መቃብር አያሸንፈውም!”ሲሉ የተደመጡት ተማሪዎቹ፤እየሞትንና እየተራብንም ቢሆን  ሙስናንና ዘረኝነትን እንቃወማለን!”ብለዋል።
ይህ  በእንዲህ እንዳለ፡ሐራ ተዋሕዶ የተባለው ድረ ገጽ እንደዘገበው ተማሪዎቹ፡በነገው ዕለት በመንበረ ፓትርያሪኩ በሚያካሂዱት ከፍተኛ የተቃውሞ ትዕይንት ምእመኑ ከጎናቸው እንዲሰለፍ ጥሪያቸውን አቅርበዋል።

የኮሌጁ ተማሪዎች ዛሬ ባወጡት መግለጫ-ምእመናን ቤተ ክርስቲያን ከመሳለምና ገንዘብ ከመስጠት/ከመመጽወት ባሻገር ስለ ቤተ ክርስቲያናቸው ጉዳይ በመጠየቅ ቀጥተኛ ተሳታፊ መኾን እንደሚገባቸው አሳስበዋል።

 

ደቀ መዛሙርቱ ማሳሰቢያውን ያስተላለፉት፣ በዛሬው የቅድስት ሥላሴ ክብረ በዓል አጋጣሚ በመንበረ ጸባዖት ቅድስት ሥላሴ ካቴድራል ለተገኘው ምእመን የኮሌጁ አስተዳደር በትምህርት አመራሩና በአካዳሚያዊ መብቶቻቸው ላይ ስለሚፈጸመው በደል በገለጹበት ወቅት ነው፡፡

 

አንጋፋው የቅድስት ሥላሴ መንፈሳዊ ኮሌጅ÷ ሊቃነ ጳጳሳትን፣ የመምሪያ ሓላፊዎችን፣ የአድባራትና ገዳማት አስተዳዳሪዎችን፣ የዩኒቨርስቲ መምህራንን፣ ተመራማሪዎችን፣ በመንግሥትና መንግሥታዊ ባልኾኑ ድርጅቶች በከፍተኛ ሓላፊነት ላይ የሚገኙ ቀደምት ምሩቃንን ያፈራ መኾኑን ደቀ መዛሙርቱ ለምእመናኑ አስታውሰዋል፡፡

 

ኮሌጁ አገልግሎቱን የሚያከናውነው ‹‹በእናንተው ገንዘብ ነው›› ያሉት ደቀ መዛሙርቱ፣ ‹‹የምእመኑ ሥራ ገንዘብ መስጠት ብቻ አይኹን፤ ስለ ቤተ ክርስቲያናችኹ ጠይቁ፤ ይህ ኮሌጅ የሕዝብ ነው፤ ነገር ግን የገጠር አብያተ ክርስቲያን እየተዘጉ፣ መናፍቃን እንደ አሸን ፈልተው ቤተ ክርስቲያኒቱን እንደ ቅርጫ ሥጋ ሊከፋፍሏት ባሰፈሰፉበት ወቅት በግለሰቦች እየተዘጋ ነው›› በማለት ከአስተዳደሩ ጋራ ሙስናን፣ ኑፋቄንና ብልሹ አሠራርን በመቃወም የገቡበትን ውዝግብ በሰፊው አብራርተዋል፡፡

 

ወደ መንበረ ፓትርያሪኩ ከዐሥር ጊዜያት በላይ በጋራና በተወካዮቻቸው በመመላለስ ጥያቄዎቻቸውን ሲያቀርቡ መቆየታቸውን የገለጹት ደቀ መዛሙርቱ በጥበቃ እየተገፈተሩ ያለውጤት ከመንገላታት በቀር ያገኙት ነገር ባለመኖሩ ምእመኑን፣ ‹‹በየብሔረሰቡ በተለያየ ቋንቋ ቤተ ክርስቲያንን የምናገለግል ልጆቻችኹ ነን፤ ሙሰኞቹ ኀያላን ናቸውና ርዱን! ነገ በጠቅላይ ቤተ ክህነት በሁለት ሰዓት በምናደርገው እንቅስቃሴ አብራችኹን ቁሙ!!›› ሲሉ በከፍተኛ አጽንዖት ተማፅነዋል።

 

በሌላ በኩል አቡነ ጢሞቴዎስ ደቀ መዛሙርቱን በፖሊቲከኝነት መወንጀል ቢጀምሩም፤የተማሪዎች መማክርት በበኩሉ፡የኮሌጁን አስተዳደር በሕግ ለመጠየቅ እየተዘጋጀ ነው።

ተማሪዎቹ በዛሬው ተቃውሟቸው “ጢሞቴዎስ ሆይ አደራህን ጠብቅ!” የሚለውን የመጽሀፍ ቃል በማሰማት ለ አቡነ ጤሞቴዎስ መልእክት ሲያስተላልፉ ተሰምተዋል።

የፌደራል ፖሊስ የግዥ አፈፃፀም ሥርዓት ለሙስና የተጋለጠ መሆኑን የጸረ ሙስና ኮምሽን በጥናት አረጋገጠ

Monday, July 15th, 2013

ሐምሌ ፰( ስምንት )ቀን ፳፻፭ ዓ/ም

ኢሳት ዜና :-የፌዴራል የሥነምግባርና የጸረ ሙስና ኮምሽን በቅርቡ ባካሄደው የአሰራር ሥርዓት ጥናት በፌደራል ፖሊስ ኮሚሽን የግዥ አፈፃፀም ለሙስና እና ብልሹ አሠራር የተጋለጠ ነው ብሎአል፡፡

በፖሊስ ኮምሽኑ የተጠና የጠቀሜታ ዝርዝር /ስፔስፊኬሽን/ አዘገጃጀት አሰራር አለመኖር፣ ግዥዎችን በዕቅድና
በፕሮግራም አለመፈፀም፣ በጀት መኖሩ ሳይረጋገጥ የግዥ ሂደቶችንማከናወን፣ በግዥ መመሪያው ከተቀመጠው የገንዘብ መጠን በላይ ግዥ መፈፀም እና የጨረታ ኮሚቴው ከግዥ መመሪያውን ተከትሎ አለመሥራት ዋና ዋና ጉድለቶች መሆናቸውን ኮምሽኑ በጥናቱ አረጋግጧል፡፡

የፌደራል መንግሥት የግዥ አፈፃፀም ሥርዓት መመሪያ የጠቀሜታ ዝርዝር /ስፔስፊኬሽን/ በተጠቃሚዎች ዝርዝር ላይ የተመሠረተ ሆኖ ዕቃዎችንና አገልግሎቶችን የሚፈለገውን ለማሟላት ያላቸውን ተፈጥሮ፣ የሚያስገኙትን ውጤት፣ ለመሥሪያ ቤቱ የሚያስገኙትን ጠቀሜታ፣ የአሠራር ባሕሪያቸውንና የታቀደላቸውን ሥራ ለማከናወን ያላቸውን የብቃት ደረጃ የሚያካትት ዝርዝር መግለጫ መዘጋጀት እንዳለበት ይደነግጋል፡፡ ይሁን እንጂ በፌደራል ፖሊስ መሥሪያ ቤት የሚዘጋጁት አንዳንድ የጠቀሜታ ዝርዝሮች  የሚገዙትን ዕቃዎች ወይም አገልግሎቶች በግልጽ የሚያሳዩ ባለመሆናቸው የግዥ ውሳኔዎች ወደአልተፈለጉ አቅጣጫዎች እንዲያጋድሉ በማድረግ የአሠራር ክፍተቶች ሊፈጥሩ እንደሚችሉ ጥናቱ ያሳያል፡፡

በዕቅድና በፕሮግራም ግዥዎችን አለመፈፀም ሌላው በኮሚሽኑ የታየ ለሙስና እና ብልሹ አሠራር የሚያጋልጥ አሰራር ነው ተብሎአል፡፡ ያለ ፕሮግራምና ዕቅድ አስቸኳይ እየተባሉ የሚፈፀሙ ግዥዎች በአይነትም ሆነ በመጠን ከፍተኛ በመሆናቸው ኮሚሽኑን ለከፍተኛ ወጪ እንደሚዳርጉ፣  የጥድፊያ ግዥ አሠራርለሙስናና ለብልሹ አሠራር የተመቻቸ ከማድረጉም በላይ የተገዙት ዕቃዎች ለረዥም ጊዜ ቦታ አጣበው ያለ አገልግሎት እንዲከማቹ፣ ከጥቅም ውጪ እንዲሆኑና ለብልሽት እንዲዳረጉ ምክንያት ሆኗል ብሏል ሪፖርቱ።

የተጠናከረ የውስጥ ቁጥጥር ሥርዓት በፌደራል ፖሊስ ኮሚሽን ውስጥ አለመኖሩ በጥናቱ የታየ ችግር ነው፡፡የውስጥ ኦዲት በግዥ ኮሚቴ በታዛቢነት የሚሳተፍ ካለመሆኑም በላይ በተሟላ መልኩ ሥራውን ኦዲት የማያደርግበመሆኑበሥራ
አጋጣሚ የሚከሰቱትን ክፍተቶች በማውጣት ለማኔጅመንቱ አጋዥ ሪፖርት በማቅረብ የእርምት ርምጃ እንዲወሰድ የሚያስችልበት ሁኔታ ጉልህ ሆኖ  አለመታየቱም ተጠቅሷል። በቀጣይ የኮሚሽኑ የውስጥ ኦዲት በጨረታ ኮሚቴ ውስጥ በታዛቢነት የሚሳተፍበትና በየወቅቱ የሥራ ሪፖርት ለማኔጅመንቱ የሚያቀርብበት አሰራር መዘርጋት እንዳለበት ጥናቱ አክሎ ጠቁሟል፡፡

ምእመኑ በቤተ ክርስቲያኑ ጉዳይ ቀጥተኛ ተሳታፊ እንዲኾን ደቀ መዛሙርቱ ጠየቁ

Sunday, July 14th, 2013
  • በነገው ዕለት በመንበረ ፓትርያሪኩ በሚያካሂዱት ከፍተኛ የተቃውሞ ትዕይንት ምእመኑ ከጎናቸው እንዲሰለፍ ጥሪያቸውን አቅርበዋል
  • አቡነ ጢሞቴዎስ ደቀ መዛሙርቱን በፖሊቲከኝነት መወንጀል ጀምረዋል
  • የተማሪዎች መማክርት የኮሌጁን አስተዳደር በሕግ ለመጠየቅ እየተዘጋጀ ነው
St Trinity College Disciples demonstrating at the gate of the Patriarchate

ደቀ መዛሙርቱ በመንበረ ፓትርያሪኩ ቅጽር በተቃውሞ ትዕይንት ላይ

ምእመናን ቤተ ክርስቲያን ከመሳለምና ገንዘብ ከመስጠት/ከመመጽወት ባሻገር ስለ ቤተ ክርስቲያናቸው ጉዳይ በመጠየቅ ቀጥተኛ ተሳታፊ መኾን እንደሚገባቸው የቅድስት ሥላሴ መንፈሳዊ ኮሌጅ ደቀ መዛሙርት አሳሰቡ፡፡

ደቀ መዛሙርቱ ማሳሰቢያውን ያስተላለፉት፣ በዛሬው የቅድስት ሥላሴ ክብረ በዓል አጋጣሚ በመንበረ ጸባዖት ቅድስት ሥላሴ ካቴድራል ለተገኘው ምእመን የኮሌጁ አስተዳደር በትምህርት አመራሩና በአካዳሚያዊ መብቶቻቸው ላይ ስለሚፈጸመው በደል በገለጹበት ወቅት ነው፡፡

አንጋፋው የቅድስት ሥላሴ መንፈሳዊ ኮሌጅ÷ ሊቃነ ጳጳሳትን፣ የመምሪያ ሓላፊዎችን፣ የአድባራትና ገዳማት አስተዳዳሪዎችን፣ የዩኒቨርስቲ መምህራንን፣ ተመራማሪዎችን፣ በመንግሥትና መንግሥታዊ ባልኾኑ ድርጅቶች በከፍተኛ ሓላፊነት ላይ የሚገኙ ቀደምት ምሩቃንን ያፈራ መኾኑን ደቀ መዛሙርቱ ለምእመናኑ አስታውሰዋል፡፡

ኮሌጁ አገልግሎቱን የሚያከናውነው ‹‹በእናንተው ገንዘብ ነው›› ያሉት ደቀ መዛሙርቱ፣ ‹‹የምእመኑ ሥራ ገንዘብ መስጠት ብቻ አይኹን፤ ስለ ቤተ ክርስቲያናችኹ ጠይቁ፤ ይህ ኮሌጅ የሕዝብ ነው፤ ነገር ግን የገጠር አብያተ ክርስቲያን እየተዘጉ፣ መናፍቃን እንደ አሸን ፈልተው ቤተ ክርስቲያኒቱን እንደ ቅርጫ ሥጋ ሊከፋፍሏት ባሰፈሰፉበት ወቅት በግለሰቦች እየተዘጋ ነው›› በማለት ከአስተዳደሩ ጋራ ሙስናን፣ ኑፋቄንና ብልሹ አሠራርን በመቃወም የገቡበትን ውዝግብ በሰፊው አብራርተዋል፡፡

image398

ደቀ መዛሙርቱ በዛሬው የቅድስት ሥላሴ ክብረ በዓል ላይ በኮሌጁ ቅጽር ላይ ተሰልፈው

ወደ መንበረ ፓትርያሪኩ ከዐሥር ጊዜያት በላይ በጋራና በተወካዮቻቸው በመመላለስ ጥያቄዎቻቸውን ሲያቀርቡ መቆየታቸውን የገለጹት ደቀ መዛሙርቱ በጥበቃ እየተገፈተሩ ያለውጤት ከመንገላታት በቀር ያገኙት ነገር ባለመኖሩ ምእመኑን፣ ‹‹በየብሔረሰቡ በተለያየ ቋንቋ ቤተ ክርስቲያንን የምናገለግል ልጆቻችኹ ነን፤ ሙሰኞቹ ኀያላን ናቸውና ርዱን! ነገ በጠቅላይ ቤተ ክህነት በሁለት ሰዓት በምናደርገው እንቅስቃሴ አብራችኹን ቁሙ!!›› ሲሉ በከፍተኛ አጽንዖት ተማፅነዋል፡፡


የአንድነት ሰልፎች በደሴና በጎንደር ተካሄዱ – ጁላይ 15, 2013

Sunday, July 14th, 2013
UDJ Demonstrations in Dessie and Gondar

የኮሌጁ ደቀ መዛሙርት በዛሬው የቅድስት ሥላሴ ክብረ በዓል ላይ ለመጣው ምእመን ተቃውሟቸውን የገለጹባቸው ኀይለ ቃሎች

Sunday, July 14th, 2013
image417
  • የቅድስት ሥላሴ መንፈሳዊ ኮሌጅን መዝጋት ታሪክን ማጥፋት/ማበላሸት ነው!
  • የቅዱስ ሲኖዶስ ምልአተ ጉባኤ ችግራችንን ይመልከት!
  • ልጆቹን የማጠይቅ አባት አለን?
  • ሙስናንና ኑፋቄን የሚያደቅ ክንድ አለን!
  • የምንማረው በምእመናን ብር ነው፡፡ ሌቦች ሆይ፣ እጃችኹ ይሰብሰብ!
  • ጢሞቴዎስ ሆይ፣ አደራህን ጠብቅ፡፡ (፩ኛጢሞ. ፬÷፳)
  • ችግራችንን የሚሰማንና መፍትሔ የሚሰጠን አባት ዐጣን!
  • የቅ/ሲኖዶሱ አባላት ትኩረት ይስጡን!
  • ሙስናን በቃል ሳይኾን በተግባር እንዋጋ!
  • ተማሪዎች ሙስናን በመዋጋታቸው ሊበረታታቱ እንጂ ሊባረሩ አይገባም!
  • ከአየህጉረ ስብከቱ ቤተ ክርስቲያንን አምነን ወጥተን ለረኀብ ተጋለጥን፡፡
  • ኮሌጁ በመዘጋቱ ከተመገብን ሰባተኛ ቀናችን ነው፡፡
  • አቤቱ የኾነብንን አስብ፡፡
  • ኮሌጁን የሚዘጋው የከፈተው ሲኖዶስ ነው፡፡
  • ኮሌጁ የኢትዮጵያ ሕዝብ እንጂ የግለሰቦች አይደለም!
  • እውነትን ሙስና አይደለም መቃብር አያሸንፈውም!
  • ጌታ ሆይ፣ ከመቅደሳችን ውስጥ የሙስናን እሾኽ ንቀል!
  • እየሞትንና እየተራብን ሙስናንና ዘረኝነትን እንቃወማለን!
  • ሙስና ከቤተ ክርስቲያናችን ይወገድ!
  • ከሓላፊነት መሸሽ በራሱ ሙስና ነው!

image415

 

image400

image403

 

image406

image418image416image420

image413image402image411image404image412image422image405

 


Amharic News 1800 UTC – ጁላይ 14, 2013

Sunday, July 14th, 2013
News, Radio Magazine or Mestawot

የደሴ ቅርንጫፍ የአንድነት መሪዎች ለደሴና አካባቢ ህዝብ ምስጋናቸዉን አቀረቡ

Sunday, July 14th, 2013

ሐምሌ 7 ቀን 2005 ዓ.ም

የአንድነትን የምስጋና መግለጫ ለማንበብ እዚህ ይጫኑ !

ከአርባ ሺህ በላይ የሚቆጠር የጎንደር ሕዝብ ድምጹን አሰማ!

Sunday, July 14th, 2013

ሐምሌ 7 ቀን 2005 ዓ.ም

የጎንደር ከተማ የገዢዉ ፓርቲ ካድሬዎችን ታላቅ አሳፋሪ አፈና ጥሶ በመሄድ ድምጹ በታላቅ ጀግንነት አሳምቷል። የአንድነት ድህረ ገጽ ላይ የወጣ
በኦዶዮ የታጀበ ዝርዝር ሸገባ እንደ እንደሚከተለዉ አቅርበናል።

እዚህ ይጫኑ !

የአፍሪቃ ኅብረት፣ መፈንቅለ መንግሥትና ፈታኙ አቋም

Sunday, July 14th, 2013
አንድ ቢሊዮን ገደማ ህዝብ ባለው ክፍለ ዓለም 54 አባል ሃገራትን ያቀፈውና ዘንድሮ 50 ኛ ዓመቱን በማክበር ላይ የሚገኘው የአፍሪቃ ኅብረት በየጊዜው በሚከሠቱ የአህጉሩ ችግሮች መፈተኑ አልቀረም ። የኅብረቱ ኮሚሽን ሊቀመንበር ወይዘሮ እንኮሳዛና ድላማኒ

ተፈጥሮዋዊ መብታችንን አትቀሙን በግርማ ሰይፉ ማሩ

Sunday, July 14th, 2013

ለማንበብ እዚህ ይጫኑ

ሰበር ዜና – የሐረር ደ/ሣህል ቅ/ሚካኤል ቤተ ክርስቲያንን ከሀ/ስብከቱ ለመገንጠል የሚንቀሳቀሱ የፕሮቴስታንታዊ ተሐድሶ መናፍቃን በጠ/ቤተ ክህነቱ የተመደቡት አዲስ አስተዳዳሪ ወደ ደብሩ እንዳይገቡ ከሀ/ስብከቱ አስተዳደር ጉባኤ አባላት ጋራ እየተናነቁ ነው

Saturday, July 13th, 2013

ክልሉ የፍትሕና ጸጥታ ዘርፍ እንዲሁም የፖሊስ ሓላፊዎች ለሁከት ፈጣሪዎቹ ወግነዋል


የቅድስት ሥላሴ መ/ኮሌጅ ደቀ መዛሙርት በነገው ክብረ በዓል ችግራቸውን ለምእመኑ ያሰማሉ፤ የቋሚ ሲኖዶሱ አብዛኞቹ አባላት ያለምእመናን ንቅናቄ ችግሩ መፍትሔ እንደማያገኝ ያምናሉ

Saturday, July 13th, 2013
  • ደቀ መዛሙርቱ ለሦስተኛ ተከታታይ ቀን የኮሌጁን የምግብ ቤት አገልግሎት ተከልክለዋል
  • የፌዴራል ጉዳዮች ሚኒስቴር ደቀ መዛሙርቱ ወደ ክረምት ዕረፍት ከመሄዳቸው በፊት የማጠቃለያ ፈተና እንዲወስዱና ተመራቂዎቹ እንዲሸኙ ጥረት እያደረገ ነው፤ በፓትርያሪኩ የመወሰን አቅም ላይ ጥርጣሬ የገባቸው የሚኒስቴሩ ሓላፊዎች ልዩ ጽ/ቤ ደቀ መዛሙርቱን በኀይል ከኮሌጁ ለማስወጣት ያቀረበውን የድጋፍ ጥያቄ ውድቅ ባደረጉበት አቋማቸው ጸንተዋል
  • ፓትርያሪኩ በሚይዟቸው አቋሞች ረዳት ሊቀ ጳጳሱ አቡነ እስጢፋኖስ ከአቡነ ጢሞቴዎስ ጋራ የእንደራሴነት ሚና እየተጫወቱ መኾኑ እየተነገረ ነው
  • አቡነ ጢሞቴዎስ በኮሌጁ ያላቸው ሥልጣን በግልጽ እንደማይታወቅ ለአጣሪ ኮሚቴው የተናገሩት የሥራ አመራር ቦርድ አባላት ኮሌጁ ‹‹ጠንካራና ውሳኔ የሚሰጡ የአስተዳደር ሰዎች›› እንደሚያስፈልጉት ጠቁመዋል
  • አጣሪ ኮሚቴው÷ የኮሌጁ አስተዳደር ራሱን ለማረም ዝግጁ እንዳልኾነ ተገንዝቧል፤ ኮሚቴው በየዘርፉ ለታዩ የአሠራር ክፍተቶች በሪፖርቱ ያቀረባቸው የአጭርና የረጅም ጊዜ የማስተካከያ ርምጃዎች በአስቸኳይ ይፈጸሙ ዘንድ የሚመለከተው የበላይ አካል መመሪያ እንዲሰጥበት ጠይቋል

የነገው አበባ ለምን ለፌደራል ፖሊስ ይሰጣል? ዳዊት ሰለሞን (ፍኖት ዘጋቢ)

Saturday, July 13th, 2013

የነገው አበባ ለምን ለፌደራል ፖሊስ ይሰጣል? ዳዊት ሰለሞን (ፍኖት ዘጋቢ)

ሐምሌ 6 ቀን 2005 ዓ.ም

አበባ የሰው ልጆች በአንድ ድምጽ «ፍቅራችንን ወክልልን» በማለት የመረጡት ይመስል የፍቅርን አደራ ተሸክሟል፡፡ከሶስተኛው አለም እስከ አንደኛው የሚገኙ የአዳም ልጆች «አበባን» የፍቅር ስጦታ በማድረግ ለሚወዱት ይቸሩታል፡፡የሚወዱት ሲሞትባቸውም ፍቅራቸውን ለሟቹ ለመግለጽ አስከሬኑ ላይ አበባ ያኖሩለታል፡፡

ወደ ደሴና ጎንደር እንምጣ፣ ነገ ከሌላው ጊዜ በተለየ አበቦች ለፌደራልና ለክልል ፖሊሶች በሰላማዊ ሰልፈኞች ይበረከታሉ፡፡ እኛ ኢትዮጵያዊያን የጦርነት ታሪክ የከበበን በመሆኑ ለወታደር ያለን ፍቅር የተለየ ነው፡፡ ዛሬ ድረስ ወታደራዊ ዮኒፎርም የለበሰ ሰው ሲመለከቱ ልባቸው ወከክ የሚልባቸው ቆነጃጅት ቁጥር የት የለሌ ነው፡፡

እንዳለመታደል ሆኖ ግን እንዲህ በስስት የምንመለከተው ወቴ፣ በውስጥ ጉዳይ በአብዛኛው የገዢዎች መገልገያ ሆኖ በእናቱ ልጅ ላይ ቃታ ሲስብ አይኑን አያሽም፡፡ አዛዦቹ ያሉትን ካልተገበረ ምን እንደሚጠብቀው ስለሚያውቅ ድንጋይ ለወረወረ ሁሉ አጠፋውን በጥይት ከማድረግ አያመነታም፡፡ ለዚህ አንገት ደፊ ታሪካችን ብዙ ማጣቀሻዎችን ማንሳት ይቻላል፡፡

የነገው ሰልፍ አበባ የሚበረከትበት ዋነኛ አላማ ፍቅርን ለመስበክ ነው፡፡ በወታደሩ፣በፖሊሱ፣በደህንነቱና በመንግስት ታማኝ ላይ የምንመዘው ሰበዝ ቢኖርም፣ ነገ ግን ፍቅርን እንሰጣለን፡፡ምላሹ ምንም ይሁን ምን የአበባው መልዕክት ፍቅር ነው፡፡ የአበባ ቀን እንበለው ይሆን?

የሚሊዮኖች ድምፅ ለነፃነት!!
አንድነት ኃይል ነው!! አንድነት ፍቅር ነው!! ፍቅር ያሸንፋል!!

የማለዳ ወግ. . . ይድረስ ለተገፊው ወገኔ ! ነብዩ ሲክራ የፍኖት ዋና አዘጋጅ

Saturday, July 13th, 2013

ሐምሌ 6 ቀን 2005 ዓ.ም

“ህገ መንግስት ተጥሷል !” ካልክ ድምጽህን በሰላማዊ ተቃውሞ አሰማ !

ይድረስ ትናንተም ሆነ ዛሬ ግፍ በነገሰባት ምድር፣ ኑሮን በመከራ ለምትገፋው ወገኔ ! ይድረስ መልካም አስተዳደር ጠፍቶ በደል ለተጫነብህ ፣ ፍትህ ርትዕ ተዛብቶ የአስተዳደር ሚዛኑ ኑሮህን ላጨለመው ወገኔ ! ይድረስ ከዲስኩር ባላለፈ “የእድገት ስላጣኔ መንገድ እየተጓዝክ ነው ” ለሚሉህ ፣ ይድረስ ግልጽነት በጎደለው “መልካም አስተዳደር” ለምትረገጠው ታጋሽ ወገን ፣ ይድረስ ትናንትም ሆነ ዛሬ ከአብራክህ ወጥተው አንተን ያልሆኑ ፣ ህመምህ የማያማቸው ፣ በደልህ በማይገባቸው የመንግስት ምስለኔ ልጆችህ እየተሰቃየህ ላለህው ! ይድረስ የግፍ በደል ቀንበር ከትከሻህ ላልወረደልህ ፣ ስቃይ መከራው ላላባራልህ ይድረስ ለከልታማው ወገኔ! ይድረስ የአንድ ጎልማሳ እድሜን በጭቆና መግፋቱ እያመመህም ቢሆን ለቻለከው ፣ በቁጣ አመጻን ከመግለጽ ተገትተህ ጎስቋላ ኑሮን በዝምታ፣ በይሁንታ እየገፋህ ላለህው ወገኔ ! በኮራህ በደላህበት ፣ አክብረህ በተከበርክበት ቅየ ያ ክፉ ቀን አለፈ ስትል ፣ ዛሬም ክፉው ቀን ተከትሎ አበሳህን እያሳየህ ለምትገኘው ተገፊ ወገኔ!

ኑሮ ሳይደላህ አመጻን አለመምረጥህ እና በደልን በዝምታ ቁዘማ ማሳለፍን የመምረጥ ምክንያትህን ከቀይህ የወጣሁ ነኝና አውቀዋለሁ ! ጎንደሬውም ሆንክ ወሎየው እንደቀረው ኢትዮጵያዊ በጨካኙ ወታደራዊ ጁንታ አገዛዝ ከአብራክህ በወጡ ጨካኝ ልጆችህ የጋለ ብረት አለሎ ተቀጥቅጠሃል ። ልጆችህ ታስረው ርህራሄ በሌላቸው የአገዛዙ አቀንቃኞች ቁም ስቅላቸውን እያዩ ተገርፈዋል ። በግፍ የተገደሉ ልጆችህን አስከሬን በወጉ እንዳትቀብር ተደርገሃል። መሽቶ እስኪ ነጋ በጨካኞች አረመኔያዊ የቀይ ነጭ ሽብር ዘመቻ ባሩድ የተረሸኑ ልጆችህ ደም ጉራንጉሩን፣ አውራ ጎዳናዎችና አደባባዩን አጨቅይቶት የከፋ የሽብር ጊዜ አሳልፈሃል፣ አይገፋ የለም ቁጣህን አምቀህ ክፉውን ቀን በሆደ ሰፊነት ገፍተሃል ! በዚያ ክፉ ዘመን የስጋ ክፋይ ወንድሞቸን ፣ “የት ይደርሳሉ!” የተባሉ የዘመድ አዝማድ ጎረቤት ትንታግ ወጣቶችን በግፈኛው አገዛዝ የተነጠቁ ወገኖች አካል ነኝ ።

ስለዚያ ዘመን የወላድ መከራ የማውቀው ጥቂት ባይባልም ፣ ሰለነበረው ስርአት አስከፊነት የታሪክ መዛግብት አገላብጫለሁ፣ የአይን እማኞችን “አሃ” ብየ አድምጫለሁ! ከሁሉም በላይ የልጆቻቸውን የሞት መርዶ ለመስማት ብርቅ ሆኖ ሳይሳካላቸው ከቀሩት እናቶች መካከል ልጅ ብሆንም፣ ያኔ የእኔዋን እናት እንባ አልረሳውም ! በድህነት ቤት ልጅ ወልደው ፣አሳድገው በሞት ሲነጠቁ ለመቅበር ሳይታደሉ የቀሩት እናቶችን ቤት ይቁጠረው ። ማቅ ለብሰው ማቅ መስለው አመታትን የገፉ እናቶች አብራክ ውጤት ነኝና የዘመኑን ስርአት ክፋት ጭነት አውቀዋለሁ። በዚያ የግፍ ዘመን በቀሩት የሃገሪቱ ክፍል እንደሆነው ሁሉ በጎንደር በጎጃም እና በወሎ ዋና ከተሞች ያለተወሰነው የግፍ እርምጃ በገጠር የወረዳና የአውራጃ ከተሞች በወጣቱ ደም የጨቀዩበተት ዘመን ፍጹም አይረሳም ።

ወገኔ ሆይ ! እዚህ ባደረሰህ መንገድ ለጋ ወጣት ልጆችህን ገብረሃልና የዛሬው ዝምታህ አይደንቀኝም ። በግፍ ጭቆናው ዘመን የሌሊቱ ጥይት እሩምታ በረድ ሲል የማለዳው ደሮ ሲጮህ ሬሳ የመፈለጉ አሰቃቂ የታሪክ ሂደት እንደ ቀረው የኢትዮጵያ ወገንህ ምሬት ሃዘንክን ጠባሳ ጥሎብሃልና ዛሬ አንገት መድፋት መቆዘምህ አያስደንቀኝም። ዛሬም ዘመን ከፍቶህ ዳግም ትንታግ ልጆችህን አንዳታጣ ስጋት ሆኖብህ ዝም በማለትህ ” ሃሞትህ ፈሰሰ !” እያልኩ ላሳብቅብህ የረከሰ ሰብዕናን አውርሰህ አላሳደግከኝምና ፣ በቁዘማ ዝምታህ አልፈርድም ። በከተማ ባሩድ እና ባልጠቀመን የእርስ በርስ ጦርነት የአብራክህን ክፋይ ልጆችህን በጆፊ አሞራ የተነጠቅክ የህብረተሰብ ክፍል ነህና ህመምህ ህምሜ በመሆኑ ይገባኛል። እናም የዛሬ ህመም ስጋትክን አሳምሬ አውቀዋለሁ ! እናም ” ለምን ግፍ ሲጫኑህ በዝምታ ትቆዝማለህ ? “ለማለት አይዳዳኝም!

ያኔ ! ያ ክፉ የደርግ ስርአት ያከትም ዘንድ ሃዘንክን ሃዘን አድርገህ በአገዛዙ ላይ አኮረፍክ ፣ ዳሩ ግን ልክ እንደ ዛሬው በዝምታ ቁዘማ አንገትክን ደፍተህ ግን አልተቀመጥክም ። ለምስክር የተረፉ ልጆችህ ለመስዋዕት በማዘጋጀት መርቀህ ወደ መራራው ትግል መርቀህ ላክካቸው ፣ እኒያ አንበሶች ተራራ ቋጥኝ ቧጠው ፣ ሸንተረር ወንዙን ተጋፍተው ተሻግረው ብሩህ በመከባበር የተገነባች ኢትዮጵያን ይፈጥሩ ዘንድ ነበር ። መራራው መስዋዕትነት በደም ተከፍሎ ያገኘህውን ውጤት ቢያሳዝንም ለሰላም ሲባል ይሁንታህን ሰጠህ ! ዲሞክራሲ ተሰብኮ እንለይ ያሉት ተለይተው፣ሃገሬው በቋንቋ ሲደለደል ሌላ መከራ ለመምጣቱ ምልክቶች ቢታዩም ይህንንም ይሁን አልክ ! ለሰላም ለእድገት ሲባል ! የሰቆጣ አላማጣው ፣ የሁመራና የወልቃይት ጠገዴውን ክፍፍልም ሳትመርጥ ፣ ሳትወድ የተጫነብህ ቢሆንም ይህንንም በዝምታ ቁጭት አለፍከው ! ያልቻልከውን ህመም የመጣብህ ፣ ከአመታት በፊት ከሱዳን የሚዋሰነው ድንግሉ የሃገርህ መሬት ከፍትህ ርትህ ውጭ ሃገሬው እየተፈናቀለ ለሱዳን እንዲሰጥ መደረጉ ነበር። ይህ አስቆጭቶ ቢያንገበግብህም ዝምታ ቁዘማህ ዛሬም ትዕግስት መሆኑን የሚረዱ ምስለኔዎችን አልታደልክም !

እናም የደም ክፋይ ነኝና ምክሬን ትሰማ እማጸንሃለሁ ! የተሰጠህን ዲሞክራሲያዊ መብት ተጠቀምበት ! ዝምታ ቁዘማውን፣ ቁጭት ንዴት አቤቱታህን በሰላማዊ ተቃውሞዎች ሁሉ ተሰልፈህ ጥያቄዎችህን ፍጹም ሰላማዊ በሆነ መንገድ ድምጽህን ከፍ አድርገህ በማሰማት ዝምታህን ትሰብር ዘንድ እመክርሃለሁ!

ኑሮህ ከድጡ ወደ ማጡ የመሆኑን ግራ አጋቢ እንቆቅልሽ የአደባባይ ሚስጥር ሆኖ እያለ ፣ ድህነት እና ስራ አጥነት በሃገር ነግሰው ፣ ኢኮኖሚ የሚሉት “አደገ !” ይሉናል ። ለእድገቱ ዋቢ ደግሞ በኑሮውን ጣራ መንካት የተደቆስውን ያንተን ጓዳ የማያውቁት የአለም ገንዘብ ድርጅት እና ከአመት አመት የሚሰጠው የእድገት ቁጥር ከፍ ማለት ብቻ ነው ። ምድር ላይ ያለውን እውነታ ግን ከሚባለው የተለየ ነው! የኢኮኖሚው ብቻውን ማደግ ከመንገድና ከፎቅ ግንባታ ያለፈ ላለመሆኑ ብዙ ማለት ይቻላል ። የኢኮኖሚው ማደግ በአንተ በዜጋው የለት ተለት ኑሮ ላይ የማይታይ የማይዳሰስ ለመሆኑ ለማንም የተደበቀ አይደለም ። በኑሮው ጣራ መንካት ፣ በድህነቱ፣ በመልካም አስተዳደር እጦትና በስራ አጥነት ምክንያት እኔ ወዳለሁበት አረብ ሃገር ብቻ ያለ ህጋዊ ማዕቀፍ ወደ ግማሽ ሚሊዮን የሚጠጉ እድሜያቸው ለአቅመ አዳም ያለደረሱት ዜጎች በህጋዊ ኮንትራት ስም ተሰደዋል። እኒህ አብዛኛው ከገጠሩ የሃገራችን ክፍሎች በደላላ ተግዘው የመጡት አብዛኛው ሴት እህቶች እድሜያቸውን ቆልለው ሲሰደዱ እንኳ ከልካይ የለም። ይህ ብቻ አይደለም ። ለስራ ስለሚሔዱበት ሃገርም ሆነ ስለሚሰሩት ስራ በቂ መረጃ አይሰጣቸውም! ችግር ቢገጥማቸው ለማን አቤት አንደሚሉና ወዴት እንደ ሚሄዱ አያውቁም ! የመልካም አስተዳደሩ እና የመንግስት ተቀቋማት ግልጽነት ብሎም ተጠያቂነት አለመኖር ድህነት እንዳሸሸው ዜጋ ድንበር ለመሻገሩ ብዙ አመላካች መረጃዎችን ማቅረብ እችላለሁ ! በዋናነት የሚነሳው ዜጎች ከሃገር በስራ ኮንትራት ከመላካቸው አስቀድሞ በሃገሮች መካከል ግልጽ ስምምነት አለመደረጉ ነው። በዚህ ሁኔታ የተሰደዱትም ቢሆን የመብት ጥሰት ሲገጥማቸው አቤት ብለው ወደ ፍትህ የሚያቀርባቸው የተዳራጁ ሚስዮኖች አሉ ከማለት የሉም ማለት ይቀላል !

ወገኔ ሆይ! የዜጎች የከፋ ስደትና የመብት ጥበቃ ጉድለት መፍትሔ ያገኝ ዘንድ መንግስት ተለያዩ ሃገር ውስጥና ውጭ መገናኛ ብዙሃን ፣ በአካል ካገኘኋቸው የመንግስት ሃላፊዎች እስከ ቆንስል እና ኢንባሲ ተጠሪዎች ፣ ወረድ ሲልም ለድርጅቱ አባላትና ደጋፊዎች ያለመታከት ተናግሬ ፣ መክሬ ፣ ዘክሬ እኔን የሰማኝ የለም! እናም ይህ በአብራክህ ክፋዮች ላይ እየደረሰ ላለው በደል በማናቸውም ስብሰባም ሆነ ሰላማዊ ሰልፍ ተሳትፎ በማድረግ ድምጽህን እንድታሰማ እመክርሃለሁ! አማጸንሃለሁ!

የህዝብን ድምጽ የሚሰማ መንግስት ይስጠን!

ከሰላምታ ጋር

ነቢዩ ሲራክ

ፍኖተ ነጻነት – የደሴ ትራንስፖርት ህዝብ እንዳያመላልስ ተደረገ

Saturday, July 13th, 2013

ሐምሌ 6 ቀን 2005 ዓ.ም

በደሴ አካባቢ ከሚገኙ ከተሞች(ከወረባቡና ሐይቅ)፣ በነገው የአንድነት ለዴሞክራሲና ለፍትህ ፓርቲ ሰላማዊ ሰልፍ ላይ ለመገኘት ወደ ከተማይቱ ለመምጣት ትራንስፖርት ያስፈልጋቸው የነበሩ ዜጎች፣ በከተማው አስተዳደር ስውር ትዕዛዝ መሰረት፣ ከዛሬ ምሽት ጀምሮ የትራንስፖርት መኪኖቹ ከአገልግሎት ውጪ እንዲሆኑ መታዘዛቸውን የየአካባቢዎቹ ነዋሪዎች ለሰልፉ አዘጋጆች በመደወል እየገለጹ ነው፡፡

ሁኔታው ያሳዘናቸው ሰዎች በቻሉት መንገድ ሁሉ ወደ ሰልፉ በመምጣት ድምጻቸውን እንደሚያሰሙና መሰናክሉን እንደሚያልፉት አስታውቀዋል፡፡

Amharic News 1800 UTC – ጁላይ 13, 2013

Saturday, July 13th, 2013
News, Call-in show or special interviews and Ye Musica Qana

መመሪያ ለጎንደር እና ደሴ ከተማ ነዋሪዎች – የሚሊዮኖች ድምጽ ለነጻነት ግብረ ኃይል(አንድነት)

Saturday, July 13th, 2013

ሐምሌ 6 ቀን 2005 ዓ.ም

“የሚሊዮኖች ድምፅ ለነፃነት” የሚል መሪ ቃል በማንገብ ዕሁድ በሚካሄደዉ ህዝባዊ የተቃዉሞ ሰልፍ ላይ ሁሉም ተሳታፊ የሚከተሉትን ተግባራት ተግባራዊ ማድረግ ይጠበቅበታል፡፡

to_dessie_and_donder_people

1. ሰልፉን ፍፁም ሰላማዊ በሆነ መንገድ ማካሄድ፡፡ የተለያዩ ትንኮሳዎች ቢፈታተኑንም እንኳን ሰልፉ ስነ-ስርዓቱን በጠበቀ እና ጨዋነት በተሞላበት መልኩ ማካሄድ ይገባል፡፡ አንድ ጠጠር እንኳን ፍፁም መወርወር የለበትም፡፡

2. የተመረጡ መፈክሮችን ብቻ ማሰማት

3. በሰልፉ ወቅት አላስፈላጊ ተግባር የሚፈፅሙ ካሉ ማጋለጥ

4. ስድብን እና አላስፈላጊ ቃላትን ከመጠቀም መቆጠብ

5. የቻልን አበባ (ይህ የበለጠ ይመረጣል) ያልቻልን አረንጓዴ ቅጠል ይዞ ከቤት መዉጣት ፤ በሰልፉ ላይ ከፍ አድርጎ ማዉለብለብ፡፡ ሰልፉ ሲጠናቀቅ የያዝነዉን አበባ ወንድሞቻችን ለሆኑት የፀጥታ አስከባሪዎች/ፖሊሶች የፍቅራችን መግለጫ እንዲሆን በገፀ-በረከትነት ማበርከት፡፡

6. የሚቻል ከሆነ ነጭ ልብስ መልበስ

7. አንድ እጅን ወደ ላይ ከፍ በማድረግ ሦስት እጣቶችን ማሳየት

8. በማንኛዉም አካል አላስፈላጊ/አፍራሽ ተግባራት ሲፈፀሙ ስናይ ለመረጃ እንዲሆን ፎቶ ማንሳት እንዲሁን በቪዲዮ መልክ መቅረፅ

9. ሰልፉ ሲጠናቀቅ በሰላም ወደ ቤት መመለስ

የአገዛዙ ካድሬዎች የወረደ ተግባርን ይመልከቱ !

Saturday, July 13th, 2013

ሐምሌ 6 ቀን 2005 ዓ.ም

የአገዛዙ ካድሬዎች ላለፉት በርካታ ሳምንታት የአንድነት ፓርቲ እያደረገ ያለዉን ሰላማዊና ሕዝባዊ ቅስቃሳ ከግቡ እንዳይደርስ ለማድረግ፣ በአለቆቻቸው ታዘው የተለያዩ የአፈና እንቅስቃሴዎችን ሲያደርጉ እንደነበረ በሰፊት ተዘግቧል። በርካታ ታሰረዋል፤ ወከባና እንግልትም ደርሶባቸዋል።

ነገር ግን የአንድነት አባላትን ደጋፊዎች እንደዉም ሕዝቡ እግዚአብሄር የሰጣቸውን የዜግነት መብት ለማረጋገጥ ቀርተዉ የተነሱ ይመስላል። አፈናዉ የበለጠ እየጨመረ በመጣ ቁጥር የሕዝቡን ድጋፍና መነሳሳትም ወደ ላይ ሄደ እንጂ አልቀነሰም።

ሕዝቡ እያሳየ ባለው ታላቅ ተነሳሽነት ተስፋ የቆረጡ የአገዛዙ ካድሬዎች የአንድነት ፓርቲ ደጋፊዎች የሚለጥፋቸውን ፖስተሮችና መፈክሮች በማንሳትና በመቀዳደድ ጸረ-ዴሞክራሲያዊና ጸረ-ሕዝብነታቸውን እያሳዩ ነዉ። አንዳንድ ፖስተሮች አልቀደድ ሲላቸው ደግሞ፣ በላዩ ላይ ጭካ እስከመቀባት የደረሱበት ሁኔታም አለ።

በኢሕአዴግ ካድሬዎች ጭካ የተቀባ የአንድነት ፖሶተር ይመልከቱ !

dirty_work_of_cadresjpg

ጎንደርና ደሴ ተነሱ – መግለጫ ከአንድነት ፓርቲ

Saturday, July 13th, 2013

ሐምሌ 7 በጎንደርና በደሴ ከተሞች ሰላማዊ ሰልፍ ላይ ተሳተፉ!!

ድምፃችሁንም በአደባባይ አሰሙ!!
————————————————————–
ከአንድነት ለዴሞክራሲና ለፍትሕ ፓርቲ(አንድነት)
የተሰጠ መግለጫ
————————————————————–

ፓርቲያችን አንድነት ህጋዊና ሰላማዊ መንገድ የሚታገል ፓርቲ በመሆኑ የሚያደርጋቸውን ፖለቲካዊ እንቅስቃሴዎች ኃላፊነት በተሞላበት ህጋዊ አግባብ ሲተገብር ቆይቷል፡፡ ፓርቲያችን “የሚሊዮኖች ድምፅ ለነፃነት/Millions of voices for freedom” በሚል መሪ ቃል የጀመረውም ህዝባዊ ንቅናቄ የህዝባችንን መሰረታዊ ጥያቄዎችን ያነገበ ነው፡፡

የአንድነት ፓርቲ ህዝባዊ ንቅናቄ አካል የሆኑ ሰላማዊ የተቃውሞ ሰልፎች በሚካሄዱባቸው ከተሞችም ስለሰልፉ ማወቅ ለሚገባቸው መንግስታዊ አካላት ህጉ በሚጠይቀው መሰረት በወቅቱ አስፈላጊው የማሳወቅ ኃላፊነቱን በአግባቡ ተወጥቷል፡፡ የኢህአዴግን መንግስት አንድነት ፓርቲ የጀመረው ህዝባዊ ንቅናቄ ታላቅ ህዝባዊ ድጋፍ ማግኘቱ አስደንግጦታል፡፡ ለዚህ ማሳያ የሚሆነው በየክልሉ ያሉ የመንግስት መዋቅሮችን በተለይም የፀጥታውን ዘርፍ በመጠቀም ህዝባዊ ንቅናቄያችንን በህገወጥ መንገድ ለማደናቀፍ መንቀሳቀሱ ነው፡፡

ፓርቲያችን ሰኔ 30 ቀን 2005 ዓ.ም በጎንደር ከተማ ሰላማዊ ሰልፍ ለማደረግ ቢያቅድም መንግስት የሰልፉ ቀን እንዲተላለፍለት አሳማኝ ጥያቄ በማቅረቡና ይህንንም ህግ ስለሚፈቅድለት ሰልፉን ለሐምሌ 7 , 2005 ዓ.ም አስተላልፏል፡፡ ኢህአዴግ ግን በአንፃሩ በጎንደር ከተማና በዞኑ በሚገኙ የተለያዩ ወረዳዎች የሚገኙ 9 የአንድነት ፓርቲ አመራሮችንና አባላትን በህገወጥ መንገድ እንዲታሰሩ አድርጓል፤እነዚህ አባላት እስከ አሁንም በእስር ላይ ይገኛሉ፡፡ ወደ ሐምሌ 7 የተላለፈውን ሰልፍም ለማደናቀፍ ከፍተኛ ጥረት ተደርጓል፡፡

አንድነት የሰጣቸውን የቅስቀሳ ተልዕኮ በመወጣት ላይ ያሉ አመራሮችንና አባላትን የማዋከብና የማገት ተግባር ተፈፅሟል፡፡ በተለይም አርብ ሐምሌ 5 ቀን 2005 ዓ.ም በጎንደር ከተማ የሚገኘውን የአንድነት ፓርቲ ጽ/ቤት በመክበብ በርካታ አባላት የታገቱ ሲሆን ፖሊሶችም ከህግ አስከባሪ አካል በማይጠበቅ ሁኔታ ከፍኖተ ነፃነት ጋዜጣ ባልደረባ ላይ ካሜራ ነጥቀዋል፡፡ የኢህአዴግ ካድሬዎችና የመንግስት ሰራተኞች የጎንደር ነዋሪ በሰላማዊ ሰልፉ ላይ እንዳይሳተፍ ቤት ለቤት በመዞር ቀስቅሰዋል፡፡

በደሴና በሀይቅ ከተሞችም የአንድነት አመራሮች በተደጋጋሚ እገታ የፈተፀመባቸው ሲሆን የትራፊክ ፖሊሶችም መደበኛ ስራቸውን በማቆም በመኪና የሚደረገውን ቅስቀሳ በተደጋጋሚ አደናቅፈዋል፡፡

የኢህአዴግ ካድሬዎችና የመንግስት ሰራተኞች የደሴ ነዋሪ በሰላማዊ ሰልፉ ላይ እንዳይሳተፍ ቤት ለቤት በመዞር ቀስቅሰዋል፡፡ በተጨማሪም በድንገት የስፖርት ዝግጅት እንዳለ በማወጅ ወጣቶችና የከተማው ነዋሪ በሰልፉ ላይ እንዳይሳተፉ ለማከላከል እየተሞከረ ይገኛል፡፡ በደሴ ከተማ የተለጠፉ ፖስተሮችን የመቅደድና በጭቃ የማበላሸት ድርጊትም ተፈፅሟል፡፡

ኢህአዴግ በጎንደርና በደሴ የሚደረገውን የቅስቀሳ ስራ በማደናቀፍ ሰልፉ እንዳይካሄድ ቢሞክርም የከተሞቹ ነዋሪዎች በተለይም ወጣቶች ከአንድነት አመራሮችና አባሎቸ ጎን በመቆም ቆራጥነታቸውን ማሳየታቸውን እናደንቃለን፡፡

አንድነት ይህን ሁሉ የኢህአዴግን ህገወጥ እርምጃ ተቋቁሞ በነገው እለት በጎንደርና በደሴ ከተሞች የጠራቸውን ታላቅ ሰላማዊ የተቃውሞ ሰልፎች በቆራጥነት ለማካሄድ በያዘው አቋም ፀንቷል ፡፡ በመሆኑም መላው የጎንደርና የአካባቢው እንዲሁም የደሴና የአካባቢው ነዋሪዎች እስከአሁን እያሳዩ ባሉት ቆራጥ ፀንተው በነገው እለት በሚደረጉት ሰልፎች ላይ እንዲሳተፉ አንድነት ፓርቲ በድጋሚ ጥሪውን ያስተላልፋል፡፡ በዚሁ አጋጣሚ በሁለቱም ከተሞች ለሰላማዊ ሰልፍ የሚወጡ ነዋሪዎች አበባና ሌሎች ወዳጅነትን የሚያንፀባርቁ ስጦታዎችን በየመንገዱ ለሚያገኟቸው ፖሊሶችና የፀጥታ አስከባሪዎች እንዲያበረከረቱና ወዳጃዊ ሰላምታ እንዲሰጡ እንጠይቃለን፡፡

የሚሊዮኖች ድምፅ ለነፃነት!!!
አንድነት ለዴሞክራሲና ለፍትሕ ፓርቲ (አንድነት)
ሐምሌ 6 ቀን 2005 ዓ.ም
አዲስ አበባ

በጎንደርና በደሴ ከተሞች ለሚደረጉት ሰላማዊ ሰልፎች መንግስት በጽሑፍ እውቅና ሰጠ

Saturday, July 13th, 2013

ሐምሌ 6 ቀን 2005 ዓ.ም

ነገ እሁድ ጠዋት ሐምሌ 7 ቀን 2005 ዓ.ም. በጎንደር እና ደሴ ከተሞች ለሚደረገው ህዝባዊ ሰላማዊ ሰልፍ ተፈቅዶ ከፖስተር መለጠፍ፣ በራሪ ወረቀት ከመበተን በተጨማሪ በድምፅ ማጉያ ሰልፉን ያዘጋጀው አንድነት ፓርቲ ቅስቀሳውን እያደረገ ይገኛል፡፡ ይንንም ተከትሎ በተመሳሳይ ጊዜ በደሴ ከተማ አራዳ ገበያ ህንፃ አንድነት ፓርቲ ተከራይቶ ያለውን ቅርንጫፍ ጽህፈት ቤት አከራዩ እንዲያስለቅቁ ጫና ቢደረግባቸውም ፤አከራዩ አቶ መሐመድ ፓርቲው ህጋዊ በመሆኑ አላስለቅቅም፣ ህጋዊ ውል ተዋውለን ነው ያከራየሁት በሚል ፈቃደኛ ሳይሆኑ ቀርተዋል፡፡ በዚህም ምክንያት ዛሬ ሐምሌ 6 ቀን 2005ዓ.ም. የአራዳ ገበያ ህንፃ “ዕድገት አነስተኛ የሱቅ ስራ ማኀበር” ተወካዮች ነን ያሉና ስማቸውን መግለፅ ያልፈቀዱ 7 ግለሰቦች ፓርቲውን ከተከራየበት ቢሮ ለማሰለቀቅ ዛሬውኑ ከጠዋቱ 2፡30 ቃለጉባዔ ይዘው የፓርቲው የደቡብ ወሎ ዞን ጽህፈት ቤት በመምጣት ቢሮውን ባስቸኳይ ልቀቁልን ሲሉ መጠየቃቸውን ማየት ችለናል፡፡

የደቡብ ወሎ ዞን የአንድነት ፓርቲ ሰብሳቢ አቶ ብስራት አቢ በበኩላቸው ፓርቲው ሲከራይ ህጋዊ ውል ተዋውሎ በመሆኑ፣ አከራዩና ህጋዊ ባለመብቱ ልቀቁልን ያሉ ባለመሆናቸው እንዲሁም አከራዩ እንኳ ልቀቁልን ቢሉ የፍርድ ቤት ማዘዣ ካለመጡ ልንለቅ አንችልም፤ አሁን አስቸኳይ ህዝባዊ ቅስቀሳ ይ በመሆናችን አትረብሹን፣ ህጋዊ ነን ብላችሁ መነጋገር የምትፈልጉ ከሆነ የዞኑ የፓርቲው ጠበቃ ከሆኑት አቶ ማስረሻ ጋር በህጋዊ መንገድ መነጋገር ትችላላችሁ ሲሏቸው ልቀቁልን ያሉት የማኀበሩ አባላት ወዲያው ጥለው ሄደዋል፡፡

በተመሳሳይ ዜና የአንድነት ፓርቲ ሰሜን ጎንደር ጽህፈት ቤት አከራይም አስለቅቁ ብሎ ያዘዛቸውን ሰው ሳይገልፁ ዛሬ ቤቱን አስለቅቂ ተብያሉ ብለው ፓርቲው ቢሮውን እንዲለቅ የጠየቁ ሲሆን የሰሜን ጎንደር የአንድነት ፓርቲ አመራር አቶ አለላቸው አታለልና አቶ ጀማል አብደላ ፓርቲው ሲከራይ ህጋዊ ውል ተዋውሎ በመሆኑ በአንድ ጊዜ ያለምንም በቂ ምክንያት ቤቱን ልቀቁልን ማለት እንደማይቻል እና ውሉን ማፍረስ ከፈለጉም እንድንለቅ የሚያስችል ህጋዊ የፍርድ ቤት ደብዳቤ እንዲያቀርቡላቸው ሲጠይቁ ያከራዩት ግለሰብ ወዲያውኑ ጥለው ሄደዋል፡፡

በአሁን ወቅትም በሁለቱም የደሴና ጎንደር ከተሞች ነገ እሁድ ሐምሌ 7 ቀን 2005ዓ.ም. ከጠዋቱ 3 ሰዓት ለሚጀምረው ህዝባዊ ሰላማዊ ሰልፍ በመኪና በመንቀሳቀስ ቅስቀሳ እየተደረገ ይገኛል፡፡ ይሁን እንጂ አንዳንድ የትራፊክ ፖሊሶችና የአማረ ክልል አድማ በታኝና ልዩ ፖሊሶች ለቅስቀሳው ማስፈቀዳችሁን አናውቅም፣ ቢፈቀድ እንኳ ለገቢዎች ክፍያ መፈፀማችሁን አሳዩን ሲሉ ለማወክ መሞከራቸው አልቀረም፡፡ በተለይ ይህን የተጠየቁት በደሴ ከተማ በቅስቀሳ ላይ ያሉት የፓርቲው አካላትም በፖለቲካ ፓርቲዎች ቸዋጅ መሰረት ለቅስቀሳ ክፍያ እንድነፈፅም አያዘንም፣ ደግሞም ተፈቅዶልናል፣ ቅስቀሳውን ለማወክ በመሞከራችሁም አናንተ እራሳችሁ ወንጀለኞች በመሆናችሁ በህግ እንጠይቃችኋለን ሲሉ ፖሊሶቹ ሊለቋቸው ችለዋል፡፡

በጎንደር ጠዋት 3 ሰዓት የሰላማዊ ሰልፉ መነሻ አውቶ ፓርኮ(ጆቫኒ ጋራዥ) ሲሆን መዳረሻው ደግሞ አቢዮት አደባባይ(ዞብል) መሆኑ ታውቋል፡፡ ደሴ የሚደረገው የነገው ሰላማዊ ሰልፍ መነሻ ደግሞ ከፓርቲው ጽህፈት አራዳ ህንፃ በፒያሳ፣ መናፈሻ አድርጎ መድረሻው ሆጤ ኳስ ሜዳ መሆኑ ታውቋል፡፡ የሁለቱም ከተማ ነዋሪዎችም ሰላማዊ ሰልፉ ባይፈቀድም ለመውጣት መሰናዳታቸውን አስታውሰው ይበልጥ ግን ባለቀ ሰዓትም ቢሆን በመፈቀዱ መደሰታቸውን በመግለፅ በሰልፉ ላይ ተገኝተው ድምፃቸውን ለማሰማት መዘጋጀታቸውን እየገለፁ ይገኛሉ፡፡

የሰብዓዊ ቀውስ በማዕከላይ አፍሪቃዊቱ ሬፓብሊክ

Saturday, July 13th, 2013
በማዕከላይ አፍሪቃዊቱ ሬፓብሊክ ያማፅያን ቡድኖች የተሰባሰቡበት የየሰሌካ ህብረት የቀድሞውን ፕሬዚደንት ፍራንስዋ ቦዚዜን በመፈንቅለ መንግሥት አስወግዶ ሥልጣን ከያዘ ወዲህ ሀገሪቱ አሳሳቢ ሰብዓዊ ቀውስ ገጥሞዋታል።